இந்தியன் ஆயில் எண்ணெய் நிறுவனம் சார்பில் ராமநாதபுரம் மாவட்டத்திலிருந்து தூத்துக்குடி வரை கடல் மார்க்கமாக எரிவாயு குழாய் பதிக்கும் திட்டம் செயல்படுத்தப்பட்டு வருகிறது. தூத்துக்குடி, புதுக்கோட்டை, குலையன்கரிசல், பொட்டல்காடு உள்ளிட்ட விவசாய பகுதிகள் வழியாகவும் இந்த எரிவாயு குழாய் பதிக்கும் திட்டத்தை செயல்படுத்த திட்டமிடப்பட்டுள்ளது. பொட்டல்காடு உள்பட 10 சுற்றுவட்டார கிராம மக்கள் விளை நிலங்கள் வழியே எரிவாயு குழாய் பதிப்பதற்கு எதிர்ப்பு தெரிவித்து வருகின்றனர்.
தொடர்ந்து எரிவாயு குழாய் பதிப்பதற்காக கொண்டுவரப்பட்ட தளவாடங்களையும், லாரிகளையும் சிறைபிடித்து பல்வேறு கட்ட போராட்டங்களை அப்பகுதி மக்கள் நடத்தி வருகின்றனர். இது தொடர்பாக எண்ணெய் நிறுவனம், கிராம மக்களிடையே பேச்சுவார்த்தை நடத்துவதற்காக தூத்துக்குடி மாவட்ட சார் ஆட்சியர் சிம்ரான்ஜீத் சிங் கலோன் தலைமையில் சமாதானக் கூட்டம் நடத்தப்படும் என அறிவிக்கப்பட்டிருந்தது. அதன்படி எண்ணெய் நிறுவன அலுவலர்கள், கிராம மக்கள் இடையேயான சமாதானக் கூட்டம் தூத்துக்குடி மாவட்ட சார் ஆட்சியர் அலுவலகத்தில் சார் ஆட்சியர் சிம்ரன்ஜீத் சிங் கலோன் தலைமையில் நடைபெற்றது.
இதில் இந்தியன் ஆயில் நிறுவனத்தால் ஏற்கனவே எரிவாயு குழாய் பதிக்கப்பட்ட இடங்கள், திட்டத்தின் செயல்பாடுகள் உள்ளிட்டவை குறித்து கிராம மக்களுக்கு விளக்கப்பட்டன. மேலும், திட்டத்தின் நோக்கம், திட்டத்தை வரையறை செய்யப்பட்ட இடத்தின் வழியாக செயல்படுத்துவது உள்ளிட்டவை குறித்து விவாதிக்கப்பட்டன. இதற்கு பதில் அளித்து பேசிய கிராம மக்கள், பிரதிநிதிகள் எண்ணெய் நிறுவனங்களால் விபத்து ஏற்பட்ட சம்பவங்கள், நிகழ்வுகள், அதனுடைய பாதிப்புகள் உள்ளிட்டவை குறித்து எடுத்துரைத்தனர். மேலும் திட்டத்தை மாற்று வழியே செயல்படுத்துவதற்கான கோரிக்கைகளையும் முன்வைத்து பேசினர்.
பின்னர் ஆட்சியரின் விளக்கத்தின் பேரில் ஐ.ஓ.சி.எல் நிறுவன திட்ட விளக்கங்கள், எண்ணெய் நிறுவனத்தால் மக்களுக்கு வழங்கப்பட்ட நோட்டீஸ்கள் ஆகியவற்றை சார் ஆட்சியர் அலுவலகத்தில் சமர்ப்பிக்க வேண்டும் என முடிவு செய்யப்பட்டது. மேலும் இந்த திட்டத்தை தொடர்ந்து அப்பகுதியில் செயல்படுத்துவது குறித்து கிராம மக்கள் கருத்துக்களின் அடிப்படையில் அடுத்தக் கூட்டத்தில் முடிவு எடுக்கப்படும் எனவும் உறுதி செய்யப்பட்டது.
இது தொடர்பாக கூட்டத்துக்கு வந்திருந்த ஆஸ்கர் என்பவர் செய்தியாளர்களிடம் பேசுகையில், "விளை நிலங்களின் வழியே எரிவாயு குழாய் பதிக்கும் திட்டம் தொடர்பான சமாதான கூட்டம் சார் ஆட்சியரின் தலைமையில் இன்று நடைபெற்றது. இதில் எந்தவிதமான முடிவும் எட்டப்படாத நிலையில் ஐ.ஓ.சி.எல். நிறுவன அலுவலர்களின் திட்ட செயல்பாடுகள், விளக்கங்கள் தொடர்பாக கிராம மக்களிடம் எடுத்துரைத்து மக்களின் கருத்துக்கள் அடிப்படையில் அடுத்த கூட்டத்தில் முடிவு எட்டப்படும்" என்றார்.
இதையும் படிங்க: குறைதீர் கூட்டமா? ஆனந்த மன்றமா? - அலுவலர்களின் அட்ராசிட்டியால் குமுறும் விவசாயிகள்!
