கன்னியாகுமரி: அய்யா வைகுண்டரின் 191 வது அவதார தினத்தை (Ayya Vaikundar Avathara Thinam) முன்னிட்டு கன்னியாகுமரி மாவட்டம் நாகர்கோவிலில் இருந்து அய்யா வைகுண்டரின் தலைமை பதி அமைந்துள்ள சாமி தோப்பிற்கு அய்யா வழி பக்தர்களின் பேரணி மற்றும் வாகன பவனி நடைபெற்றது. கன்னியாகுமரி மாவட்டம் மட்டுமின்றி தமிழ்நாட்டின் பல்வேறு மாவட்டங்கள் மற்றும் கேரளாவில் இருந்தும் ஏராளமான அய்யா வழி பக்தர்கள் இந்த பேரணியில் கலந்து கொண்டனர்.
அய்யா வைகுண்டரின் தலைமை பதி கன்னியாகுமரி மாவட்டம் சாமி தோப்பில் அமைந்து உள்ளது. மிகவும் புகழ்பெற்ற இந்த தலைமை பதியில் ஆண்டுதோறும் நடைபெறும் முக்கிய விழாவான அவதார தின விழா வெகு விமர்சையாக கொண்டாடப்படுவது வழக்கம். அந்த வகையில் அய்யா வைகுண்டரின் 191 வது அவதார தினம் இன்று (மார்ச்.4) வெகு விமரிசையாகக் கொண்டாடப்பட்டது.
இதனையொட்டி, நாகர்கோவில் உள்ள நாகராஜா கோயில் திடலில் இருந்து பிரம்மாண்டமான ஊர்வலம் சாமி தோப்பில் அமைந்துள்ள தலைமை பதிக்கு புறபட்டு சென்றது. முன்னதாக, நேற்று விழாவின் தொடக்கமாக சாமி தோப்பு தலைமை பதியில் இருந்து 'வைகுண்ட தீபம்' ஏற்றப்பட்டு அதனைக் கொண்டு சென்று ஆதலவிளை மாமலையில் தீபம் ஏற்றும் நிகழ்ச்சியோடு அவதார தின விழா தொடங்கியது.
அதே நேரத்தில், திருவனந்தபுரத்தில் இருந்தும் திருச்செந்தூரிலிருந்து புறப்பட்ட வாகன பேரணிகள் நேற்று இரவு நாகராஜா கோயில் திடலில் வந்தடைந்தன. இதே போன்று, பல்வேறு மாவட்டங்களில் இருந்து வந்த வாகனப் பேரணிகளும் நாகராஜா கோயில் திடலுக்கு நேற்று இரவு வந்து சேர்ந்தன.
