தூத்துக்குடி: தமிழகம் முழுவதும் பாஜக சார்பில் ‘என் மண் என் மக்கள்' என்ற பெயரில் மாநிலத் தலைவர் அண்ணாமலை அனைத்து தொகுதிகளுக்கும் நடைபயணம் மேற்கொண்டு வருகிறார். இந்த நிலையில், நேற்று (ஆகஸ்ட் 11) மாலை தூத்துக்குடி மாவட்டம் கோவில்பட்டியில் அவர் நடைபயணம் மேற்கொண்டார்.
இனாம் மணியாச்சி சந்திப்பு பகுதியில் இருந்து தொடங்கிய நடைபயணமானது, அண்ணா பேருந்து நிலையத்தில் முடிவடைந்தது. அதன் பின்னர், பாஜக மாநிலத் தலைவர் அண்ணாமலை பேசியதாவது, ”சாமானிய மனிதர்களுக்கான ஆட்சி மத்தியில் நடந்து கொண்டிருக்கிறது. எட்டயபுரத்தில் பிறந்த முண்டாசு கவிஞன் பாரதிக்கு இந்து பல்கலைக்கழகத்தில் ஒரு இருக்கை வழங்கப்பட்டுள்ளது.
முண்டாசு கவிஞனின் கனவு மிகப்பெரியது. மேக் இன் இந்தியா திட்டம் குறித்து 100 ஆண்டுகளுக்கு முன்பே சுயசார்பு பாரதம் பேசியவர். அவரது கனவை நிறைவேற்றியவர், பிரதமர் மோடி. இங்குள்ள ஆட்சியாளர்கள் பாரதியாருக்கு உரிய மரியாதையும், பெருமையும் கொடுப்பதில்லை. ஏனென்றால் பாரதி பேசிய தேசியம், ஆன்மீகம், பராசக்தி ஆகியவை இங்குள்ள ஆட்சியாளர்களுக்கு பிடிக்காது.
அதேபோல், கரிசல் காட்டு மண்ணில் பிறந்து சாகித்ய அகாடமி விருது பெற்ற கி.ராஜநாராயணனின் புகழை பாஜக போற்றுகிறது. 9 ஆண்டுகள் சிறையில் கழித்தவர், காமராஜர். ஆனால், தற்போது 2 நாள் சிறை சென்றுவிட்டு மிசா என்கின்றனர். கோவில்பட்டி கடலைமிட்டாய்க்கு புவிசார் குறியீடு வேண்டும் என இங்குள்ள மக்கள் கேட்டபோது, 2020ஆம் ஆண்டு அதற்கு புவிசார் குறியீடு வழங்கியவர், பிரதமர் நரேந்திர மோடி.
இதையும் படிங்க: தமிழகத்தின் முதல் யானைகள் பாதுகாப்பு தொடர்பான மாநாடு கோவையில் இன்று தொடக்கம்!
கோவில்பட்டியை ஹாக்கிபட்டி என பெயர் மாற்ற வேண்டும் என்கின்றனர். அந்த அளவுக்கு இங்கு பயிற்சி பெற்ற வீரர்கள் மாநில, இந்திய அணிகளில் விளையாடுகின்றனர். சுதந்திர போராட்டம், கடலைமிட்டாய், ஹாக்கி என பெரும் சிறப்பு பெற்றது, கோவில்பட்டி. அதேபோல், கோவில்பட்டி, சாத்தூர், விருதுநகர் ஆகிய பகுதிகளில் இந்தியாவில் 80 சதவீத தீப்பெட்டி தொழிற்சாலைகள் உள்ளன. இங்குள்ளவர்களின் கோரிக்கையை ஏற்று, சீனாவில் இருந்து இறக்குமதி செய்யக்கூடிய லைட்டர்களுக்கு பிரதமர் மோடி தடை விதித்துள்ளார்.
மோடியின் முகவரி கோபாலபுரத்தில் இல்லை. ஏழையின் குடிசையில் இருக்கிறது. யாரொல்லம் உழைத்து முன்னேறுகிறார்களோ, அங்கு மோடியின் முகவரி உள்ளது. யாரொல்லாம் இந்தியாவை முன்னேற்ற வேண்டும் என்று எண்ணுகிறார்களோ அங்கு மோடியின் முகவரி உள்ளது. தமிழகத்தில் 46 லட்சம் விவசாயிகளுக்கு ஆண்டுக்கு ரூ.6 ஆயிரம் மோடி வழங்கி வருகிறார். 15 லட்சம் குடும்பங்களுக்கு வீடுகள் கட்டிக் கொடுக்கப்பட்டுள்ளன. இவை அனைத்தும் பெண்கள் பெயரில் அசையா சொத்துக்களாக உள்ளன.
இளையரசனேந்தல் பிர்காவைச் சேர்ந்த தொடக்கக் கல்வித்துறை, மின்வாரியம், உள்ளாட்சி துறையை தென்காசி மாவட்டத்தில் இருந்து கோவில்பட்டியுடன் சேர்க்க வேண்டும் என அங்குள்ள மக்கள் என்னிடம் கோரிக்கை வைத்துள்ளனர். இதனை நிச்சயமாக செய்ய வேண்டுமென திமுக அரசை வலியுறுத்துவோம். இல்லம்தோறும் குடிநீர் என்ற ஜல்ஜீவன் திட்டம் என்பது மோடியின் கனவு திட்டம். இதன் அடிப்படையில் தமிழகத்தில் 66 சதவீத வீடுகளுக்கு குழாய் இணைப்பு கொடுக்கப்பட்டுள்ளன. ஆனால், அந்த குழாயில் திமுக அரசால் குடிநீர் வழங்க முடியவில்லை. பிரதமர் மோடியின் திட்டத்துக்கு தாங்கள்தான் செய்தோம் என்று விளம்பரம் தேடிக் கொண்டுள்ளது திமுக அரசு.
குடிநீர் குறித்து கோவில்பட்டி நகர்மன்ற பாஜக உறுப்பினர் விஜயகுமார், கனிமொழி எம்.பி., அமைச்சர் கீதாஜீவன் ஆகியோரிடம் சென்று முறையிட்டார். அப்போது அமைச்சர் கீதாஜீவன், நகர்மன்ற உறுப்பினர் கவுன்சிலர் விஜயகுமாரை தகாத வார்த்தைகளால் திட்டியுள்ளார். அவர் தமிழகத்தில் உள்ள பள்ளிகளில் அழுகிய முட்டையைத்தான் கொடுப்பார். அவருக்கு சாமானிய மனிதனின் வலி எப்படி தெரியும்?
