தூத்துக்குடி: தென் மாவட்டங்களான தூத்துக்குடி, திருநெல்வேலி, கன்னியாகுமரி மற்றும் தென்காசி ஆகிய மாவட்டங்களில் பெய்த கனமழையால் ஏற்பட்ட சேதங்களைப் பார்வையிட 6 பேர் கொண்ட மத்தியக் குழு, இன்று (டிச 20) தூத்துக்குடி மாவட்டத்துக்கு வந்துள்ளனர்.
தூத்துக்குடி மாநகராட்சி அலுவலகத்தில் நடைபெற்ற அதிகாரிகளுடனான கலந்தாலோசனைக் கூட்டத்தைத் தொடர்ந்து, அவர்கள் தூத்துக்குடி மாநகரில் வெள்ளத்தால் பாதிக்கப்பட்ட ஸ்டேட் பேங்க் காலனி, முத்தம்மாள் காலனி, ஆதிபராசக்தி நகர் ஆகிய பகுதிகளில் படகு மூலம் வெள்ள பாதிப்புகளைப் பார்வையிட்டனர்.
இதன் பின்னர் நகராட்சி நிர்வாக கூடுதல் ஆணையர் பிரகாஷ் செய்தியாளர்களைச் சந்தித்தார். அப்போது இந்த ஆய்வு குறித்து அவர் கூறுகையில், “தென் மாவட்டங்களில் பெய்த கனமழை காரணமாக தூத்துக்குடி, திருநெல்வேலி, கன்னியாகுமரி மற்றும் தென்காசி ஆகிய மாவட்டங்களில் ஏற்பட்டுள்ள வெள்ள பாதிப்புகளை ஆய்வு செய்ய இந்திய ரானுவத்தைச் சேர்ந்த மூத்த அனுபவம் வாய்ந்த கர்னல் தலைமையில், மூத்த அதிகாரிகள் 6 பேர் கொண்ட குழு வருகை தந்துள்ளனர்.
முதல் நாளாக இன்று (டிச.20) தூத்துக்குடியில் மழையால் பாதிக்கப்பட்ட பல்வேறு பகுதிகளை ஆய்வு செய்துள்ளனர். இந்த ஆய்வின் முடிவில் வீடுகள், விவசாய நிலங்கள், மீனவப் படகுகள், உயிரிழப்பு உள்ளிட்ட பல்வேறு சேதாரங்கள் எல்லாவற்றையும் கணக்கிட்டு, ஒரு அறிக்கையாகத் தயார் செய்து தொகுத்து, அதன் மூலமாக இழப்பீடுகளை வாங்குவதற்கு உண்டான பல்வேறு கட்ட நடவடிக்கைகள் எடுக்கப்படும்.
இதன் தொடர்ச்சியாக, நாளை (டிச.21) திருநெல்வேலி மாவட்டத்தில் மழையால் பாதிக்கப்பட்ட பகுதிகளில் ஆய்வு நடைபெற உள்ளது. மொத்தமாக இன்று (டிச.20) மற்றும் நாளை (டிச.21) ஆகிய இரண்டு நாட்களும் இது நடைபெற உள்ளது. இதன் பிறகு, சேதாரங்கள் குறித்து அறிக்கை தயார் செய்யும் பணி நடைபெற உள்ளது.
தென் மாவட்டத்தில் ஏற்பட்டுள்ள மழை வெள்ள சேதாரத்திற்கு அவசரக்கால இழப்பீடாக ரூ.2 ஆயிரம் கோடி வழங்க வேண்டி பிரதமரைச் சந்தித்து, முதல்கட்டமாக தமிழக முதலமைச்சர் கோரிக்கை மனுவினை அளித்துள்ளார். ஆனால், அனுபவத்தின் அடிப்படையில் ஒரு உத்தேசமாக குறைந்தபட்சம் தூத்துக்குடி, திருநெல்வேலி மாவட்டங்களுக்கு மட்டும் ரூ.5,000 கோடி சேதார இழப்பீடு தேவைப்படும் என்று கணக்கிடப்பட்டுள்ளது.
தற்போது வரை 9 உயிரிழப்புகள் ஏற்பட்டுள்ளதாக தகவல்கள் கிடைத்துள்ளது. இருப்பினும் முழு சேதாரம், உயிர்ப்பலி குறித்து தற்போதுதான் முழுமையான கணக்கெடுப்பு எடுக்கப்பட்டு வருகிறது. தூத்துக்குடி மாவட்டத்தில் உள்ள சுமார் 40 இடங்களுக்கு எளிதில் செல்ல முடியாத நிலை உள்ளது. அந்தப் பகுதிகளில் எல்லாம் ராணுவம் மற்றும் என்.டி.ஆர்.எப் போன்ற பயிற்சி பெற்றவர்கள் மட்டுமே செல்லக்கூடிய நிலை உள்ளது. ஆகையால், இன்னும் ஆறு மணி நேரத்தில் பெரும்பாலான பகுதிகளில் கணக்கீடு செய்யப்படும்.
மேலும், ஹெலிகாப்டர்கள் ஒரு நாளைக்குத் தேவைக்கு தகுந்தார்போல் பயன்படுத்தப்படுகிறது. தற்போது பத்து ஹெலிகாப்டர்கள் வரை பாதிக்கப்பட்ட ஒவ்வொரு பகுதிக்கும் அனுப்பப்பட்டு, அத்தியாவசியப் பொருட்கள் பாதிக்கப்பட்ட பொதுமக்களுக்கு வழங்கப்படுகிறது.
இதுமட்டுமல்லாது, முதியவர்கள் மற்றும் கர்ப்பிணிகள் மீட்கப்பட்டு வருகின்றனர். அந்த வகையில், தேசிய பேரிடர் மீட்புக் குழுவினர் உள்பட 400க்கும் மேற்பட்டோர் வெள்ள பாதிப்பில் சிக்கியவர்களை மீட்கும் பணியில் ஈடுபட்டுள்ளனர்" என்று தெரிவித்தார்.
இதையும் படிங்க: அதிகனமழையால் ஸ்தம்பித்த தென்மாவட்டங்கள்; பணிகளை விரைந்து முடிக்க அரசு அதிகாரிகளுக்கு முதலமைச்சர் உத்தரவு!
