நாட்டில் ஏழு கட்டங்களாக நடைபெறவிருக்கும் மக்களவைத் தேர்தல் தமிழ்நாட்டில் இந்த மாதம் 18ஆம் தேதி நடைபெறவுள்ளது. மேலும் இதே நாளில் 18 சட்ட மன்ற தொகுதிகளுக்கான இடைத்தேர்தலும் நடைபெறவுள்ளது. இதற்கான தேர்தல் பணிகளும், பரப்புரைகளும் நாடு முழுவது முழுவீச்சில் நடைபெற்று வருகின்றன.
இந்நிலையில் நாம் தமிழர் கட்சியின் திருவாரூர் சட்டமன்றத் தொகுதி வேட்பாளர் வினோதினி மற்றும் நாகப்பட்டினம் நாடாளுமன்றத் தொகுதி வேட்பாளர் மாலதி ஆகியோரை ஆதரித்து நாம் தமிழர் கட்சியின் ஒருங்கிணைப்பாளர் சீமான் தேர்தல் பரப்புரையில் ஈடுபட்டார்.
"எங்களால்தான் நாட்டைப் பாதுகாக்க முடியும் என பாரதிய ஜனதா கட்சியினர் கூறுகிறார்கள். ஆனால் பாரதிய ஜனதாவிடமிருந்துதான் நாட்டைக் காப்பாற்ற வேண்டும். ஒன்றுமே இல்லாத பாரதிய ஜனதாவை திமுகதான் தமிழகத்திற்கு அழைத்து வந்தது. இந்தியாவிற்கு பக்கத்து நாடாக பாகிஸ்தான் இல்லை என்றால் பாரதிய ஜனதாவுக்கு எப்படி அரசியல் இல்லையோ, அதேபோன்று இந்தத் தேர்தலில் பாரதிய ஜனதா இல்லை என்றால் திமுகவிற்கு அரசியல் இல்லை" என்று சாடினார்.
மேலும், "எதிர் காலத்தில் பாஜகவிடமும், காங்கிரஸிடமும் நாட்டை ஒப்படைத்தால் நாடு ஐந்து பைசாவிற்குக்கூட தேறாது" என்று சீமான் கடுமையாக விமர்சித்தார்.
