திருவாரூர் மாவட்டம், வைப்பூர் அருகே உள்ள திருவாதிரை மங்கலத்தைச் சேர்ந்தவர் பாரதி மோகன் (27) இவரது மனைவி வேம்பு (23). இவர்கள் இருவரும் வாய் பேச இயலாதவர்கள். கூலி வேலைக்குச் சென்று குடும்பத்தை நடத்தி வந்துள்ளனர். இந்தத் தம்பதிக்கு திருமணமாகி இரண்டு ஆண்டுகள் ஆன நிலையில், பாவேந்தன் எனும் ஒன்றரை வயது ஆண் குழந்தை இவர்களுக்கு உள்ளது.
இந்நிலையில், கடந்த ஓராண்டுக்கும் மேலாக தம்பதிகள் இருவருக்கும் இடையே தொடர்ந்து குடும்பத் தகராறு இருந்து வந்துள்ளது. இதனால் வேம்பு கோபித்துக் கொண்டு தனது தாயார் வீட்டுக்குச் சென்ற நிலையில், உறவினர்கள் அவரை சமாதானப்படுத்தி இருவரையும் ஒன்று சேர்த்து வைத்துள்ளனர்.
இந்நிலையில், இன்று காலை இருவருக்கும் இடையே வழக்கம்போல் குடும்பத் தகராறு ஏற்பட்டது. அப்போது ஆத்திரமடைந்த பாரதி மோகன், தன் அருகில் உறங்கிக் கொண்டிருந்த தனது குழந்தையை தூக்கி தரையில் ஓங்கி எறிந்துள்ளார். இதனையறிந்த அக்கம் பக்கத்தினர், ரத்த வெள்ளத்தில் துடிதுடித்த குழந்தையை உடனடியாக மீட்டு, திருவாரூர் அரசு மருத்துவக் கல்லூரி மருத்துவமனைக்கு அனுப்பி வைத்தனர்.
இது குறித்து தகவலறிந்த வைப்பூர் காவல் துறையினர் சம்பவ இடத்திற்குச் சென்று பாரதி மோகனை கைது செய்து விசாரணை நடத்தி வருகின்றனர்.
இதையும் படிங்க:காய்ச்சலால் உயிரிழந்த குழந்தைக்கு இறுதிச்சடங்கு செய்த பிடிஓ!
