திருவாரூர் மாவட்டத்தில் உள்ள பெருகவாழ்ந்தான் என்னும் பகுதியில் நிகழ்ச்சி ஒன்றில், கலந்துகொண்ட பள்ளிக் கல்வித் துறை அமைச்சர் செங்கோட்டையன் நிகழ்ச்சிக்குப் பிறகு செய்தியாளர்களைச் சந்தித்தார்.
'இந்தியா முழுவதும் மத்திய அரசு, அனைவருக்கும் கல்வி என்கிற திட்டத்தின் கீழ் ஐந்து, எட்டாம் வகுப்புகளுக்குப் பொதுத்தேர்வை அமல்படுத்தியுள்ளது. பல மாநிலங்கள் அதனைப் பின்பற்றி, இந்த ஆண்டே பொதுத் தேர்வினைக் கொண்டு வந்துள்ளது.
தமிழ்நாடு முதலமைச்சர் கருணை உள்ளத்தோடு 3 ஆண்டுகள் காலத்திற்கு தமிழ்நாட்டில் விதிவிலக்கு அளித்துள்ளார். மூன்று ஆண்டு காலத்திற்குப் பிறகு மக்களுடைய கருத்து, கல்வியாளர்களின் கருத்தின் அடிப்படையில் பொதுத்தேர்வுகள் செயல்படுத்தப்படும்.
11, 12ஆம் வகுப்புகளுக்கு கணினி ஆசிரியர்கள் தொடர்பான வழக்கு நீதிமன்றத்தில் நிலுவையில் இருப்பதால், தீர்ப்பு வந்தவுடன் விரைந்து கணினி ஆசிரியர்கள் தேர்வு செய்யப்படுவார்கள். அரசு மற்றும் அரசு உதவி பெறுகின்ற பள்ளிகளில் மட்டும்தான் அரசு கேள்வித்தாள் வழங்கப்படும் . தனியார் பள்ளி பாடத்திட்டம் வேறு, அரசு பாடத்திட்டம் வேறு.
புதிதாக அரசு சார்பில் உருவாக்கியுள்ள கல்வி பாடத்திட்டம் இந்தியாவில் முன்மாதிாியாக உருவாக்கப்பட்டுள்ளது. 12ஆண்டுகாலத்திற்குப் பிறகு இந்த மாற்றம் ஏற்பட்டிருக்கிறது.
மாணவர்களின் எதிர் காலம் இன்னும் ஒரு ஆண்டுகாலத்திற்குப் பிறகு பிரகாசமாக மாறுவதற்கு கல்வி மாற்றங்கள் செய்யபட்டுள்ளது" என தொிவித்தார்.
இதையும் படிங்க : முதலமைச்சர் பழனிசாமியை புகழ்ந்து தள்ளிய அமைச்சர்!
