திருவண்ணாமலை: உலக பிரசித்தி பெற்ற பஞ்ச பூத தலங்களில் அக்னி ஸ்தலமாக விளங்கும் திருவண்ணாமலை அண்ணாமலையார் கோயிலில் திருக்கார்த்திகை தீபத்திருவிழா கடந்த 27ஆம் தேதி அதிகாலை கொடியேற்றத்துடன் தொடங்கியது. கடந்த 9 நாட்களும் பல்வேறு வாகனத்தில் காலையிலும் இரவிலும் வெகு விமர்சையாக நடைபெற்று பஞ்சமூர்த்திகள் மாட வீதி உலா நடைபெற்றது.
10 ஆம் நாளான இன்று (டிச. 6) அதிகாலை அண்ணாமலையார் கோயில் நடை திறக்கப்பட்டு அண்ணாமலையார் மற்றும் உண்ணாமலை அம்மனுக்கு சிறப்பு அபிஷேகம் மற்றும் ஆராதனை நடைபெற்றது. இதனை தொடர்ந்து 4 மணியளவில் அண்ணாமலையார் கருவறை முன்பாக ஏகன் அனேகனாக மாறும் தத்துவத்தை விளக்கும் விதமாக கோயிலின் கருவறையில் இருந்து கொண்டு வரப்பட்ட தீபத்தினை கொண்டு ஐந்து மடக்குகளில் பரணி தீபம் ஏற்றப்பட்டது.
அண்ணாமலையார் கருவறையில் ஏற்றப்பட்ட இந்த பரணி தீபத்தினை சிவாச்சாரியர்கள் ஊர்வலமாக கொண்டு சென்று கோயிலில் உள்ள அம்மன் சன்னதி, விநாயகர் சன்னதி, முருகர் சன்னதி உள்ளிட்ட மற்ற சன்னதிகளில் பரணி தீபத்தினை ஏற்றினர்.
இந்த பரணி தீப தரிசனத்தை பல்லாயிரக்கணக்கான பக்தர்கள் கலந்து கொண்டு கண்டுகளித்து, அண்ணாமலையாருக்கு அரோகரா என பக்தி முழகமிட்டு சாமி தரிசனம் செய்தனர். இதனை தொடர்ந்து இன்று மாலை 6 மணியளவில் கோயிலின் பின்புறம் 2,668 அடி உயரமுள்ள மலை மீது மகா தீபம் ஏற்றப்படும்.
முன்னதாக பரணி தீபத்தினை முன்னிட்டு அண்ணாமலையார் கோயில் முழுவதும் வண்ண வண்ண மலர்களால் அலங்காரம் செய்யப்பட்டு இருந்தது. இதற்காக ஐ.ஜி. கண்ணன் தலைமையில் 12,000 போலீசார் பாதுகாப்பு பணியில் ஈடுபட்டுள்ளனர். பரணி தீபம் விழாவில் இந்து அறநிலைத்துறை அமைச்சர் சேகர்பாபு, திருவண்ணாமலை மாவட்ட ஆட்சியர் பா. முருகேஷ் மற்றும் அரசு அதிகாரிகள் கலந்து கொண்டனர்.
இதையும் படிங்க: திருவண்ணாமலை திருவிழா: பக்தர்களுக்கு தீபம் பார்க்க நிபந்தனை!
