ஊரடங்கு உத்தரவு காரணமாக அனைத்து மதுபானக் கடைகளும் மூடப்பட்டுள்ளதால் பல்வேறு இடங்களில் சட்டவிரோதமாக கள்ளச்சாராயம் காய்ச்சுவது அதிகரித்து வருகிறது. அந்த வகையில், திருவண்ணாமலை மாவட்டம் ஜமுனாமுத்தூர் மலைப் பகுதிகளில் அதிக அளவில் கள்ளச்சாராயம் காய்ச்சப்படுவதாக மாவட்ட காவல் கண்காணிப்பாளர் சிபி சக்கரவர்த்திக்கு ரகசிய தகவல் கிடைத்தது.
இதனையடுத்து, ஆள் நடமாட்டம் இல்லாத மலைப்பகுதிகளில் ட்ரோன் கேமராக்கள் மூலம் சாராய ஊறல்கள் போடப்பட்டிருக்கும் இடத்தை கண்காணித்து, நேரடியாக சம்பவ இடத்திற்குச் சென்ற காவல் துறையினர், ஊறல்களை அழித்தும், சட்டவிரோதமாக சாராயம் காய்ச்சிய நபர்களையும் கைது செய்தனர்.
இதனைத்தொடர்ந்து, திருவண்ணாமலை மாவட்ட அனைத்து உள்கோட்ட காவல் துணை கண்காணிப்பாளர் தலைமையில் மதுவிலக்கு மற்றும் சட்டம் ஒழுங்கு காவல் ஆய்வாளர்கள், உதவி காவல் ஆய்வாளர்கள், காவலர்கள் மற்றும் மாவட்ட டெல்டா குழுவினர்கள் இணைந்து ஊரடங்கு அமல்படுத்தப்பட்ட நாளிலிருந்து ஏப்ரல் 26ஆம் தேதிவரை மதுவிலக்கு சோதனை நடத்தினர்.
இதில், 26 ஆயிரத்து 440 லிட்டர் சாராய ஊறல், 11 ஆயிரத்து 300 லிட்டர் சாராயம், கள் 173 லிட்டர், மதுபான பாட்டில்கள் மொத்தம் 634.575 லிட்டர் கைப்பற்றப்பட்டுள்ளது. மேலும், சாராய கடத்தலுக்கு பயன்படுத்திய 100 இருசக்கர வாகனங்கள், மூன்று சக்கர வாகனம் ஒன்று, இரண்டு நான்கு சக்கர வாகனங்கள் பறிமுதல் செய்யப்பட்டு 551 வழக்குகள் பதிவு செய்து, 496 குற்றவாளிகள் நீதிமன்ற காவலுக்கு அனுப்பப்பட்டுள்ளனர்.
மேலும், மதுவிலக்கு அதிரடி நடவடிக்கையாக மலைப்பகுதிகளில் மற்றும் சந்தேகத்திற்கிடமான இடங்களில் ட்ரோன் கேமரா வைத்து கண்காணிக்கப்பட்டு தொடர்ந்து நடவடிக்கை எடுக்கப்படும் என்று காவல் துறை தரப்பில் தெரிவிக்கப்பட்டுள்ளது.
இதையும் படிங்க: இளைஞர்கள் மீது தாக்குதல் நடத்திய இரு காவலர்கள் பணியிடை நீக்கம்!
