திருவள்ளூர் மாவட்டம் ஊத்துகோட்டையில், ஆந்திர-தமிழ்நாடு எல்லைப் பகுதியில் அமைந்துள்ள மளிகைக் கடை ஒன்றில், தடை செய்யப்பட்ட போதை புகையிலைப் பொருட்கள் விற்பனை செய்யப்பட்டு வந்துள்ளன.
இது குறித்து காவல்துறையினருக்கு வந்த ரகசிய தகவலையடுத்து ஊத்துக்கோட்டை காவல் துணை கண்காணிப்பாளர் சந்திரஹாசன் தலைமையிலான, காவல்துறையினர் அங்குள்ள கடைகளில் அதிரடி சோதனையில் ஈடுபட்டனர். அப்போது அப்பகுதியில் செந்தில்குமார் என்பவருக்குச் சொந்தமான கடையில் பண்டல் பண்டலாக தடைசெய்யப்பட்ட புகையிலை சம்பந்தப்பட்ட போதைப் பொருட்களையும், மேலும் கடையில் இருந்த பிளாஸ்டிக் பைகளையும் பறிமுதல் செய்தனர்.
இதையடுத்து கடை உரிமையாளர் செந்தில்குமாரை காவல்துறையினர் கைது செய்து விசாரணை மேற்கொண்டு வருகின்றனர். கைப்பற்றப்பட்ட புகையிலை, பிளாஸ்டிக் ஆகிய இரண்டு பொருட்களின் மொத்த மதிப்பு சுமார் ஐந்து லட்சம் என்று காவல் அலுவலர்கள் தெரிவித்தனர்.
