திருவள்ளூர் அடுத்த மேல்நல்லாத்தூரில் ஹெச்.எம்.எஃப்.சி.எல். எனப்படும் கார் உதிரி பாகம் தயார் செய்யும் தொழிற்சாலை செயல்பட்டுவருகிறது. கடந்த 22 ஆண்டுகளுக்கும் மேலாக அலுவலகப் பணியாளர்கள், தொழிலாளர்கள் என 200-க்கும் மேற்பட்டோர் நிரந்தரப் பணியாளர்களாக வேலை செய்துவந்துள்ளனர்.
இந்நிலையில், பெருமளவு பங்குகளை ஹெச்.எம்.எஃப்.சி.எல். நிறுவனம் ஃபிரான்ஸ் நாட்டு நிறுவனத்துக்கு விற்றுவிட்டதால், அங்கு பணிபுரியும் நிரந்தரப் பணியாளர்களாக உள்ள அலுவலக ஊழியர்களை வெளியேற முதல் கட்டமாக உத்தரவிட்டுள்ளது.
இதனால் ஊழியர்கள் உள்ளிருப்புப் போராட்டத்தில் தொடர்ந்து 6 நாட்களாக ஈடுபட்டுவருகின்றனர். தொழிலாளர்கள் வீட்டிற்கு வராமல் தொழிற்சாலையிலேயே இருப்பதால், அவர்களது குடும்பத்தினர் நேற்று மாவட்ட ஆட்சியர் மகேஸ்வரி ரவிக்குமாரை நேரில் சந்தித்து மீண்டும் பணியில் அமர்த்துமாறு கண்ணீர் மல்க கோரிக்கை விடுத்தனர்.
இந்த விவகாரத்தில் மாவட்ட ஆட்சியர் தலையிட்டு தங்களின் வாழ்வாதாரத்தை காக்க நடவடிக்கை எடுக்க வேண்டும் என்றும், இல்லையேல் குடும்பத்துடன் தற்கொலை செய்துகொள்ள வேண்டிய கட்டாயத்தில் இருப்பதாகவும் அவர்கள் வேதனையுடன் தெரிவித்தனர்.
