திருவள்ளூர் மாவட்டம் பெரியபாளையம் சுற்றுவட்டார இடங்களில் வசித்துவரும் பெண்கள், பூவிருந்தவல்லியில் உள்ள தனியார் ஏற்றுமதி ஆடை நிறுவனத்தில் பணியாற்றி வருகின்றனர்.
இந்நிலையில் இன்று (ஆகஸ்ட்.14) வழக்கம்போல் பெரியபாளையத்தில் இருந்து 10 பெண் தொழிலாளர்களை ஏற்றிக் கொண்டு வேன் பூவிருந்தவல்லி நோக்கிச் சென்றது.
அப்போது வடமதுரை கிராமத்தை வேன் கடக்கும் போது ஓட்டுநரின் கட்டுப்பாட்டை இழந்து சாலையிலிருந்து கீழே இறங்கி மின்கம்பத்தில் மோதி விபத்திற்குள்ளானது. இந்த விபத்தில் வேனிலிருந்த ஓட்டுநர் உட்பட 10 பெண் தொழிலாளர்கள் காயமடைந்தனர்.
இதையடுத்து தகவலறிந்து சம்பவ இடத்திற்குச் சென்ற காவல் துறையினர், காயமடைந்தவர்களை மீட்டு திருவள்ளூர் அரசு மருத்துவமனைக்குச் சிகிச்சைக்காக அனுப்பி வைத்தனர். மேலும் இச்சம்பவம் குறித்து பெரியபாளையம் காவல் துறையினர் வழக்குப் பதிவு செய்து விசாரணை மேற்கொண்டு வருகின்றனர்.
