’சசிகலா எந்த கட்சியில் இணைந்தாலும் அந்த கட்சி வலுவடையும்’ - நயினார் நாகேந்திரன் பேட்டி

கட்சி வளர வேண்டுமென்றால் சசிகலா பாஜகவில் இருக்க வேண்டும், சசிகலா எந்த கட்சியில் இணைந்தாலும் அந்த கட்சி வலுவடையும் அவருக்கு குறிப்பிட்ட சமுதாய பின்னணி உள்ளது, என பாஜக எம்எல்ஏ நயினார் நாகேந்திரன் கூறியுள்ளார்.

திருநெல்வேலி: நெல்லை சட்டமன்ற தொகுதி பாஜக உறுப்பினர் நயினார் நாகேந்திரன் இன்று (ஜூன் 1) புதுக்கோட்டையில் பத்திரிகையாளர்களிடம் பேசும்போது, சசிகலா பாஜகவில் இணைந்தால் வரவேற்போம், அவர் வந்தால் பாஜகவின் வளர்ச்சிக்கு உதவியாக இருக்கும், என்று கருத்து தெரிவித்திருந்தார்.

சசிகலா அதிமுகவை கைப்பற்றுவார் என்று பரபரப்பாக பேசப்பட்ட சூழலில் திடீரென அவர் அரசியலை விட்டு விலகி ஆன்மீக பயணம் மேற்கொண்டார். அதைத்தொடர்ந்து மீண்டும் அவர் அதிமுகவை கைப்பற்ற காய் நகர்த்துவதாக அரசியல் வட்டாரங்கள் தெரிவித்தன இது போன்ற சூழ்நிலையில் சசிகலாவை பாஜகவுடன் இணைத்து நயினார் நாகேந்திரன் வெளியிட்ட கருத்து தமிழக அரசியல் வட்டாரத்தில் பெரும் பரபரப்பை ஏற்படுத்தியது.

இதற்கிடையில், சசிகலா பாஜகவில் இணைவது குறித்து நயினார் நாகேந்திரன் பேசியது அவரது தனிப்பட்ட கருத்து கட்சியின் கருத்து அல்ல, என்று அண்ணாமலை தெரிவித்தார். அண்ணாமலைக்கு பதிலளிக்கும் வகையில் சசிகலா பாஜகவில் மட்டுமல்ல எந்த கட்சியில் இணைந்தாலும் அந்த கட்சி வலுவடையும் என்று மீண்டும் நயினார் நாகேந்திரன் அதிரடி காட்டியுள்ளார்.

இதுகுறித்து நெல்லையில் அவர் பத்திரிகையாளர்களுக்கு அளித்த பேட்டியில், பாஜக வளர வேண்டும் என்று சொன்னால், சசிகலா பாஜகவில் இணைந்தால் பாஜக வலுவாக இருக்கும். இது பாஜகவின் கருத்தல்ல எனது தனிப்பட்ட கருத்து. ஏனென்றால் சசிகலா எந்தக் கட்சிக்கு சென்றாலும் அவருக்கென ஒரு சமுதாய பின்னணி உள்ளது.

ஜெயலலிதாவுடன் பலகாலம் பொதுவாழ்க்கையில் இருந்திருக்கிறார். அவருக்கென்று ஒரு செல்வாக்கு இருக்கிறது. நிச்சயமாக சசிகலாவின் வருகை எந்த கட்சிக்கு வந்தாலும் அது வலுவாக இருக்கும் என்று கூறினார்.

இதையும் படிங்க: பாஜகவில் இணைகிறாரா சசிகலா? - அண்ணாமலை பதில்!