திருநெல்வேலி: அரிகேசவநல்லூரில் உள்ள அரியநாதர் திருக்கோயிலில் நடைபெறும் கும்பாபிஷேக விழாவில் கலந்து கொள்வதற்காக நெல்லை மாவட்டத்திற்கு வருகை தந்த தெலங்கானா மாநில ஆளுநர் தமிழிசை சௌந்தரராஜனுக்கு, நெல்லை மாவட்ட விருந்தினர் மாளிகையில் மாநகர காவல் துறை சார்பில் காவல் அணிவகுப்பு மரியாதை வழங்கப்பட்டது.
இதனையடுத்து நெல்லை மாவட்ட ஆட்சியர் கார்த்திகேயன் மற்றும் நெல்லை மாநகர காவல் ஆணையாளர் ராஜேந்திரன் உள்ளிட்டோர் ஆளுநருக்கு புத்தகம் வழங்கி வரவேற்பு அளித்தனர். இதனைத் தொடர்ந்து செய்தியாளர்களைச் சந்தித்த தெலங்கானா ஆளுநர் தமிழிசை சௌந்தரராஜன், ''அனைவரும் சமமாக நடத்தப்பட வேண்டும் என்பதே சமூக நீதி. பல்வேறு மதங்கள் உள்ள நாட்டில் பொது சிவில் சட்டம், சமூக நீதி தேவை என்பதற்காகவே கொண்டு வரப்படுகிறது.
பொது சிவில் சட்டம் ஒரு சமூகத்திற்கு எதிரான சட்டம் என ஒரு சிலரால் தோற்றுவிக்கப்படுகிறது. ஒரு வீட்டில் நான்கு நபர்கள் இருந்தால் தனித்தனியாக அவர்களுக்கு சட்டம் இருக்க முடியாது. அதனாலேயே அனைவருக்கும் சமமான பொது சிவில் சட்டம் கொண்டு வரப்படுகிறது. டெல்லி முதலமைச்சர் கெஜ்ரிவால், பொது சிவில் சட்டத்திற்கு ஆதரவு தெரிவித்து இருக்கிறார். சரத் பவார் போன்றோர் கூட பொது சிவில் சட்டத்தை விமர்சனம் செய்ய வேண்டாம் எனக் கூறியுள்ளனர்.
இந்த காலகட்டத்திற்கு அவசியமானது, பொது சிவில் சட்டம். அனைவரும் ஒன்றாக இருக்க வேண்டும் என்பதற்காகவே இந்த சட்டம் கொண்டு வரப்படுகிறது. பெண்களுக்குப் பாதுகாப்பு அளிக்கும் வகையில் உள்ள முத்தலாக் சட்டத்தைக் கூட சிலர் அரசியல் ஆக்கி வருகின்றனர். ஆன்மிகம் இந்தியாவை வளர்க்கிறது. அனைத்து மத நம்பிக்கைகளும் பாதுகாக்கப்பட வேண்டும். மலைவாழ் மக்கள் இன்னும் முழுமையாக முன்னேறவில்லை.
அவர்களுக்கான உரிமைச் சட்டம் இருக்கிறது. பொது சிவில் சட்டத்தில் இருந்து மலைவாழ் மக்களுக்கு சில விலக்குகள் அளிக்கப்படலாம். கர்நாடகத்தில் எந்த கட்சி ஆட்சியில் இருக்கிறதோ, அதைப் பொறுத்து மேகதாது அணை பிரச்னை குறித்து இங்கு உள்ளவர்கள் பேசுகிறார்கள். கன்னியாகுமரி நாடாளுமன்றத் தொகுதியில் நான் போட்டியிடுவதாக சமூக வலைதளங்களில் தொடர்ந்து வெளியாகிக் கொண்டே இருக்கிறது'' என சிரித்துக் கொண்டே பதில் அளித்தார்.
எதிர்க்கட்சிகளைச் சேர்ந்த பதினைந்துக்கும் மேற்பட்ட கட்சிகள் ஒன்றிணைந்து கூட்டணி குறித்து பேசி வரும் நிலையில், மகாராஷ்டிராவில் 40 எம்எல்ஏக்கள் வெளியேறிய சம்பவம் தொடர்பாக எழுப்பிய கேள்விக்கு, ''இது முற்றிலும் அரசியல் சார்ந்த கேள்வி. இது குறித்து நான் பதில் அளிக்க முடியாது. பாண்டிச்சேரி துணைநிலை ஆளுநர் என்ற பொறுப்பில் இருக்கும் எனக்கு சிறப்பு அதிகாரங்கள் உள்ளன. எனவே, அதற்கு உட்பட்டு நான் செயல்படுகிறேன்.
முன்னாள் முதலமைச்சர் வைத்தியலிங்கம் சில குற்றச்சாட்டுகளைக் கூறுகிறார். அவர் கூறுவது போல எதுவும் இல்லை'' என்றார். மேலும், கேஸ் விலை உயர்வு தொடர்பாக பாண்டிச்சேரியில் அமைச்சர் ஒருவர் முற்றுகையிடப்படுகிறார் என்ற கேள்விக்கு ''பாண்டிச்சேரியில் 300 ரூபாய் மானியமாக கேஸ்-க்கு வழங்கப்படுகிறது. பெண்களுக்கு ஆயிரம் ரூபாய் உதவித் தொகையும் வழங்கப்படுகிறது. முற்றுகைச் சம்பவம் எது போன்ற சூழலில் நடந்தது என்பது எனக்கு தெரியவில்லை'' எனக் கூறினார்.
இதையும் படிங்க: சினிமா தொடர்பான கேள்விகளுக்கு கையெடுத்து கும்பிட்ட ஆளுநர் தமிழிசை செளந்தரராஜன்!
