திருநெல்வேலி: கரோனா மூன்றாவது அலை குறித்து மாவட்ட நிர்வாகம் பல்வேறு விழிப்புணர்வு நிகழ்ச்சிகளை நடத்தி வருகிறது. அந்த வகையில், எல்இடி திரையுடன் கூடிய விழிப்புணர்வு வாகனத்தை மாவட்ட ஆட்சியர் விஷ்ணு இன்று (அக்.2) கொடியசைத்து தொடங்கிவைத்தார்.
அதைத் தொடர்ந்து கரோனா விழிப்புணர்வு ஆடியோவையும் வெளியிட்டார். திருநெல்வேலி ரயில் நிலையத்திற்கு கேரளாவிலிருந்து வரும் பயணிகளுக்கு கரோனா பரிசோதனை செய்யப்படுவதை ஆய்வு செய்தார்.
முன்னெச்சரிக்கை நடவடிக்கைகள்
பின்னர் செய்தியாளர்களுக்குப் பேட்டி அளித்த ஆட்சியர் கூறுகையில், மூன்றாவது அலை முன்னெச்சரிக்கை நடவடிக்கையாக ரயில் நிலையங்கள், மாவட்ட எல்லை சோதனைச் சாவடிகளில் கரோனா பரிசோதனை அதிகரிக்கப்பட்டுள்ளது.
கேரளா பயணிகளுக்கு தொற்று அறிகுறி இருப்பின் பரிசோதனை செய்கிறோம். தேவைப்பட்டால் கேரளாவிலிருந்து வரும் அனைத்து பயணிகளுக்கும் 100 விழுக்காடு பரிசோதனை நடத்த தயாராக இருக்கிறோம். மாவட்டத்தில் 24 மணி நேரம் இயங்கும் வார் ரூம் செயல்பட்டு வருகிறது.
3.57 லட்சம் தடுப்பூசி
நாள்தோறும் 3000 க்கும் அதிகமான பரிசோதனை மேற்கொள்ள நடவடிக்கைகள் எடுக்கப்பட்டுள்ளன. நோய் தொற்று கண்டறியப்பட்ட இடங்களை கட்டுபாட்டுப் பகுதிகளாக மாற்றி, தீவிரமாக கண்காணிக்கப்படுகிறது.
இதுவரை 3.57 லட்சம் பேருக்கு தடுப்பூசி செலுத்தப்பட்டுள்ளது. கோவிட் கேர் மையம் அனைத்தும் தயார் நிலையில் உள்ளது. மூன்றாவது அலைக்குத் தேவையான அனைத்து முன்னெச்சரிக்கை நடவடிக்கைகளும் எடுத்து வருகிறோம். இதுதொடர்பாக அனைத்து துறை அலுவலர்கள் அடங்கிய குழு அமைக்கப்பட்டு கண்காணிப்பு தீவிரப்படுத்தப்படும்.
ஆக்ஸிஜன் உற்பத்தி நிலையம்
மாவட்டத்தில் இதுவரை ஆக்ஸிஜன் உற்பத்தி செய்யப்படாத நிலையில் தற்போது முதல் முறையாக கூடங்குளம் அரசு மருத்துவமனை, இரண்டு தனியார் நிறுவனங்கள் ஆக்ஸிஜன் உற்பத்தி செய்கின்றனர். மாவட்டத்தில் நோயாளிகளுக்கு வழங்க ஆக்ஸிஜன் தட்டுபாடு இல்லை" என்று தெரிவித்தார்.
இதையும் படிங்க: நடிகர்களின் கெட்டப்பில் புதுச்சேரி முதலமைச்சர்
