தமிழ்நாடு உள்பட ஐந்து மாநில சட்டப்பேரவைத் தேர்தலுக்கான அறிவிப்பு இந்திய தேர்தல் ஆணையத்தால் நேற்று (பிப்.26) அறிவிக்கப்பட்டது. அதன்படி, தமிழ்நாட்டில் வருகிற ஏப்ரல் 6ஆம் தேதி ஒரே கட்டமாக அனைத்து தொகுதிகளுக்கும் வாக்குப்பதிவு நடத்தப்பட்டு, மே 2ஆம் தேதி வாக்கு எண்ணிக்கை நடைபெறவுள்ளது.
இந்நிலையில் தேனி மாவட்ட ஆட்சியரும், மாவட்ட தேர்தல் அலுவலருமான கிருஷ்ணனுண்ணி இன்று (பிப்.27) ஆட்சியர் அலுவலகத்தில் செய்தியாளர்களைச் சந்தித்தார். அப்போது பேசிய அவர், “நேற்று மாலை தேர்தல் தேதி அறிவிக்கப்பட்டது முதல் தேர்தல் நடத்தை விதிகள் அமலுக்கு வருகிறது.
தேனி மாவட்டத்தில் 198- ஆண்டிபட்டி சட்டப்பேரவைத் தொகுதியில் 1 லட்சத்து 36 ஆயிரத்து 257ஆண் வாக்காளர்களும், 1 லட்சத்து 39 ஆயிரத்து 640 பெண் வாக்காளர்களும், 34 மூன்றாம் பாலினத்தவர் என, மொத்தம் 2 லட்சத்து 75 ஆயிரத்து 931 வாக்காளர்கள் உள்ளனர். 199-பெரியகுளம் (தனி) தொகுதியில் 1 லட்சத்து 39 ஆயிரத்து 900ஆண் வாக்காளர்களும், 1 லட்சத்து 45 ஆயிரத்து 28 பெண் வாக்காளர்களும், 103 மூன்றாம் பாலினத்தவர் என, மொத்தம் 2 லட்சத்து 85 ஆயிரத்து 31 பேர் உள்ளனர்.
200-போடிநாயக்கனூரில் 1 லட்சத்து 36 ஆயிரத்து 50 ஆண்களும், 1 லட்சத்து 41 ஆயிரத்து 893 பெண்களும், 21 மூன்றாம் பாலினத்தவர் என மொத்தம் 2 லட்சத்து 77ஆயிரத்து 964 பேர் உள்ளனர். 201-கம்பம் தொகுதியில் 1 லட்சத்து 39 ஆயிரத்து 619 ஆண் வாக்காளர்களும், 1 லட்சத்து 45 ஆயிரத்து 918 பெண் வாக்காளர்களும், 37 மூன்றாம் பாலினத்தவர் என 2 லட்சத்து 85 ஆயிரத்து 574 வாக்காளர்கள் உள்ளனர். நான்கு சட்டப்பேரவைத் தொகுதிகளில் மொத்தமாக 5 லட்சத்து 51 ஆயிரத்து 826 ஆண் வாக்காளர்களும், 5 லட்சத்து 72 ஆயிரத்து 479 பெண் வாக்காளர்களும், 195 மூன்றாம் பாலினத்தவர் என, மொத்தம் 11 லட்சத்து 24 ஆயிரத்து 500 வாக்காளர்கள் உள்ளனர்.
நான்கு சட்டப்பேரவைத் தொகுதிகளுக்கும், 576 அமைவிடங்களில், ஆயிரத்து 561 வாக்குச்சாவடி மையங்கள் உள்ளன. இதில் ஆயிரத்து 221 முதன்மை வாக்குச்சாவடி மையங்கள், 340 துணை வாக்குச்சாவடி மையங்களாகும். மாவட்டத்திலுள்ள அனைத்து வாக்குச்சாவடி மையங்களுக்கும் வாக்குச்சாவடி அலுவலர்களாக (PO, PO1, PO2, PO3) 7496 நபர்கள் நியமிக்கப்பட்டுள்ளனர். மேலும், பதற்றமான 306 வாக்குச்சாவடி மையங்களுக்கும் நுண்பார்வையாளர்கள் நியமனம் செய்யப்பட்டுள்ளனர்.
மாவட்ட ஆட்சியர் அலுவலகத்தில் 24 மணிநேரமும் செயல்படும் கட்டுப்பாட்டு அறை திறக்கப்பட்டுள்ளது. தேர்தல் தொடர்பான புகார்களை 1950 என்ற கட்டணமில்லா தொலைபேசி எண்ணிலும், cVIGIL என்ற பிரத்யேக செயலியை தேர்தல் ஆணையம் அறிமுகப்படுத்தியுள்ளது.
மேலும், நான்கு தொகுதிகளுக்கும் பயன்படுத்த மின்னணு வாக்குப்பதிவு இயந்திரங்கள் Control Unit -2008, Ballot Unit-2702, 2091 விவிபேட் இயந்திரங்கள் ஆய்வு செய்து தயார் நிலையில் வைக்கப்பட்டுள்ளது. 80 வயதிற்கு மேலுள்ள வாக்களர்கள் ஏறக்குறைய 24ஆயிரம் நபர்கள் கண்டறியப்பட்டு, அவர்களுக்குத் தபால் மூலமாக வாக்களிக்க ஏற்பாடுகள் செய்யப்பட்டுள்ளன” எனத் தெரிவித்தார்.
இதையும் படிங்க: குமுளியில் ஒரு கிலோ கஞ்சா எண்ணெய் பறிமுதல்!
