ரேசன் கடை சுண்டலை கடத்த முயன்ற ஊழியர்: பறிமுதல் செய்த கிராம மக்கள்!

தேனி: கம்பம் அருகே நியாயவிலைக் கடையிலிருந்து கள்ளச்சந்தையில் விற்பனை செய்வதற்காக இருப்பு வைக்கப்பட்டிருந்த சுண்டல் பயறை பொதுமக்கள் கைப்பற்றி காவல் துறையினரிடம் ஒப்படைத்தனர்.

தமிழ்நாடு அரசு நியாய விலைக்கடைகள் மூலம் வறுமைக் கோட்டிற்கு கீழுள்ள குடும்ப அட்டைதாரர்களுக்கு தலா 5 கிலோ சுண்டல் பயறும், மற்ற குடும்ப அட்டைதாரர்களுக்கு 1 கிலோ சுண்டல் பயறும் விநியோகிக்க உத்தரவிட்டுள்ளது.

இந்நிலையில், தேனி மாவட்டம் கம்பம் சுருளிப்பட்டியிலுள்ள (கடை எண்: 8) நியாய விலைக்கடையில் பொதுமக்களுக்கு விநியோகிப்பதற்கு வைக்கப்பட்டிருந்த சுண்டல் பயறுகள் சுருளிப்பட்டியிலிருந்து கள்ளச்சந்தையில் விற்பனை செய்வதற்காக 300 கிலோ சுண்டல் கடத்த முயல்வதாக அப்பகுதி மக்களுக்குத் தகவல் கிடைத்துள்ளது.

இதையடுத்து, அப்பகுதி மக்கள் நியாவிலைக் கடைக்கு படையெடுத்து வந்ததைக் கண்ட நியாவிலைக் கடை ஊழியர், அங்கிருந்து தப்பியுள்ளார். பின்னர், விற்பனை செய்வதற்காக வைத்திருந்த சுமார் 300 கிலோ சுண்டல் பயறை பொதுமக்கள் கைப்பற்றினர்.

சுண்டலை கைப்பற்றிய காவல் துறை:

பின்னர், ராயப்பன்பட்டி காவல் துறையினர், உணவுப் பொருள் பாதுகாப்பு மற்றும் கடத்தல் தடுப்பு பிரிவு அலுவலர்களுக்கும் தகவல் தெரிவித்தனர். இதையடுத்து, சம்பவ இடத்திற்கு வந்த அலுவலர்கள் 300 கிலோ சுண்டல் பயறை கைப்பற்றி, அதனை கடத்த முயன்ற நியாய விலைக்கடை ஊழியரை தேடி வருகின்றனர்.

இது குறித்து அப்பகுதியினர் கூறுகையில், “சுண்டல் பயறை தவிர்த்து அரிசி, சர்க்கரை உள்ளிட்ட பொருள்களையும் இதேபோல கடத்தும் சம்பவம் சுருளிப்பட்டி நியாய விலைக் கடையில் நடந்து வருகிறது. எனவே, மாவட்ட ஆட்சியர் இது குறித்து நடவடிக்கை எடுத்து, பொதுமக்களுக்கு விநியோகிக்கும் பொருள்கள் கடத்தலை தடுத்திட வேண்டும்” எனக் கோரிக்கை விடுத்துள்ளனர்.

இதையும் படிங்க: ரேஷன் கடையில் காலியாகவுள்ள பணியிடங்களுக்கு நேர்காணல்