புதிய தமிழகம் கட்சி தலைவர் டாக்டர் கிருஷ்ணசாமி இன்று தேனியில் செய்தியாளர்களை சந்தித்தார். அப்போது பேசிய அவர், “ஏழு உட்பிரிவுகளை உள்ளடக்கி தேவேந்திர குல வேளாளர் என்ற மசோதா கடந்த 13ஆம் தேதி நாடாளுமன்றத்தில் தாக்கல் செய்யப்பட்டது. இது ஏற்புடையது என்றாலும், முழுமையானதல்ல. குடும்பன், பன்னாடி, காலாடி உள்ளிட்ட வரலாற்றுச் சிறப்புமிக்க பெயர்களுக்கு எந்தவித குறைகளும் இல்லை. அதேவேளையில் இச்சமுதாயத்தினரை பட்டியல் பிரிவில் வைத்திருப்பதால், அவர்களின் அடையாளம் மறைக்கப்பட்டது, வளர்ச்சி தடைபட்டது, பொதுமக்களோடு கலந்துகொள்ளும் வாய்ப்பு தடைப்பட்டதால், சண்டைகளும், சச்சரவுகளும் ஏற்பட்டு சமூக நல்லிணக்கம் கெட்டுவிட்டது.
தமிழராகவோ, இந்துவாகவோ, இந்தியராகவோ அடையாளப்படுத்த முடியாமல் ஒரு தீண்டாமைச் சுவராகவே பட்டியல் பிரிவில் இன்று வரை இருந்து வருகிறது. அதனால்தான் பட்டியல் பிரிவிலிருந்து வெளியேற்றப்பட்டு தேவேந்திர குல வேளாளர் என்று அழைக்கப்பட வேண்டும் என்பதே இச்சமுதாய மக்களின் கோரிக்கை. எனவே வருகிற மார்ச் 8ஆம் தேதி நாடாளுமன்றத்தில் இந்த மசோதா விவாதத்திற்கு எடுத்துக்கொள்ளும் வேளையில், பட்டியல் பிரிவிலிருந்து வெளியேற்றப்பட்ட புதிய ஷரத்தையும் இணைத்து திருத்த மசோதாவையும் நிறைவேற்றித் தர வேண்டும் என்பதே எங்களின் முக்கிய கோரிக்கை ஆகும்.
பட்டியல் பிரிவிலிருந்து நாங்கள் வெளியேறுவதால் பிற சமுதாயத்தினருக்கு எந்தவித பாதிப்பும் ஏற்படப் போவதில்லை. அவர்களது சலுகைகளை நாங்கள் பறித்துக்கொள்ளப் போவதில்லை. பரந்து விரிந்த தமிழ் சமுதாயத்தில் ஒன்றிணைவதற்கும், சமூக நல்லிணக்கம் ஏற்படுவதற்கும் இந்த பட்டியல் வெளியேற்றம் உறுதுணையாக இருக்கும்” எனத் தெரிவித்தார்.
மேலும், “திராவிட கட்சிகளின் கருத்தில், சிந்தனையில் மிகப்பெரிய பிழை இருக்கிறது. அதை அவர்கள் திருத்திக்கொள்ள வேண்டும். பெரியாரை உதாரணம் சொன்னால் மட்டும் போதாது. அவரை புரிந்துகொள்ள வேண்டும். அவர் சொன்ன கால கட்டம் என்பது நூறு ஆண்டுகளுக்கு முன்பானது. இன்று பெரியார் இருந்திருந்தால் நான் சொன்ன கருத்தைதான் அவர் கூறியிருப்பார். திராவிடர்களை, ஆதி திராவிடர்களாக பிரித்தது தவறாகும். 60 ஆண்டுகளுக்கு மேலாக ஆட்சியில் இருந்த திராவிட கட்சிகள் செய்த பிழையினால்தான் தமிழ் சமுதாயம் இன்று தமிழனாக அடையாளப்படுத்த முடியாமல், சாதி ரீதியாக பிரிந்து கிடக்கிறோம். எனவே திராவிடத்திற்கு மாற்று சிந்தனை வந்தால்தான் தமிழ்நாடு உருப்படும்” என்றார்.
இதையும் படிங்க...ஜெயலலிதா பிறந்தநாள் கொண்டாட்ட நிரல்களை வெளியிட்ட அதிமுக
