தேனி: பொதுவாக வீட்டில் வளர்க்கப்படும் செல்லப் பிராணிகள் மீது உரிமையாளர்களுக்கு அதீத பாசம் இருப்பது வழக்கம். குறிப்பாக வளர்ப்பு நாய்கள் குடும்பத்தில் ஒரு நபராகவே நடத்தப்படுகின்றன. அதற்கு நாய்களின் பாசமும், விசுவாசமும் தான் முக்கிய காரணம். அதுபோல தேனியில் தான் ஆசையாக வளர்த்த நாயை காணவில்லை என்று போஸ்டர் ஒட்டிய உரிமையாளர் ஒருவர் கண்டுபிடித்து கொடுப்பவருக்கு ரூ. 10 ஆயிகம் பரிசுத்தொகை வழங்கப்படும் என்றும் அறிவித்துள்ளார்.
இந்த போஸ்டர் உள்ளூர் மக்களிடையே கவனம் பெற்றுள்ளது. பெரியகுளம் அருகே உள்ள பொம்மிநாயக்கன்பட்டி பகுதியைச் சேர்ந்தவர் நாசர். இவருக்கு சொந்தமான தென்னந்தோப்பு மற்றும் வாழைத் தோப்புகளில் காவல் பணிக்காக சிப்பிப்பாறை வகையைச் சேர்ந்த 3 நாய்களை வளர்த்து வந்துள்ளார்.
கடந்த சில தினங்களுக்கு முன்பாக அதில் ஒரு நாய் காணாமல் போனது. அந்த நாயை அவர் பல இடங்களில் தேடியும் கிடைக்கவில்லை. இதனால் நாசர் அந்த சிப்பிபாறை நாயின் புகைப்படத்தை போஸ்டர் அடித்து, அதை கண்டுபிடித்து தருபவர்களுக்கு பத்தாயிரம் ரூபாய் சன்மானம் வழங்கப்படும் என்று அறிவித்துள்ளார். அதோடு தனது செல்போன் எண்ணையும் போஸ்டரில் குறிப்பிட்டுள்ளார். இந்த போஸ்டர் பொம்மிநாயக்கன்பட்டி, ஜெயமங்கலம், மேல்மங்கலம், தேவதானப்பட்டி உள்ளிட்ட கிராமங்கள் ஒட்டப்பட்டுள்ளன.
இதையும் படிங்க: ஒரே நேரத்தில் 4 ஏடிஎம்களில் ரூ.75 லட்சம் வரை கொள்ளை.. திருவண்ணாமலையில் பரபரப்பு..
