நீட் தேர்வு ஆள்மாறாட்ட வழக்கில் கைது செய்யப்பட்ட மாணவன் உதித்சூர்யா, அவரது தந்தை வெங்கடேசன் அளித்த வாக்குமூலத்தில் மேலும் நான்கு மாணவர்கள் ஆள்மாறாட்டம் செய்திருப்பது தெரியவந்தது.
இதனையடுத்து சென்னையைச் சேர்ந்த தனியார் மருத்துவக்கல்லூரி மாணவர்கள் பிரவீன், ராகுல் அவர்களது தந்தையர் சரவணன், டேவிஸ், மாணவி அபிராமி அவரது தந்தை ஆகியோரை கடந்த செப்டம்பர் 27ஆம் தேதி தேனியில் உள்ள சிபிசிஐடி அலுவலகத்திற்கு காவல் துறையினர் விசாரணைக்காக அழைத்துவரப்பட்டனர்.
இதையடுத்து மாணவர்கள் அவர்களது தந்தையர் சரவணன், டேவிஸ் ஆகிய நால்வரும் அடுத்தடுத்த நாள்களில் தேனி நீதிமன்றத்தில் ஆஜர்படுத்தப்பட்டு 15 நாள் நீதிமன்ற காவலில் வைக்கப்பட்டனர். பின்னர், இவர்களின் சார்பில் தேனி நீதிமன்றத்தில் பிணை கேட்டு சென்னை வழக்கறிஞர் விஜயகுமார் மனு தாக்கல் செய்திருந்தார். இந்த மனு மீதான விசாரணை கடந்த 10ஆம் தேதி நடைபெற்றபோது சிபிசிஐடி விசாரணை அலுவலர் சித்ராதேவி நேரில் ஆஜராகததால் விசாரணை ஒத்திவைக்கப்பட்டது.
இன்று நடைபெற்ற மனு மீதான விசாரணையின்போது, மாணவர் சேர்க்கைக் குழுவிடம் ஆள்மாறாட்டம் குறித்த விசாரணை இன்னும் முழுமையடையவில்லை என சிபிசிஐடி தரப்பில் கோரிக்கைவிடுக்கப்பட்டது. அவர்களின் கோரிக்கையை ஏற்ற நீதிபதி பன்னீர்செல்வம் நால்வரின் பிணை மனு மீதான விசாரணையை நாளை ஒத்திவைத்தார்.
இதையும் படிங்க: தொடரும் நீட் ஆள்மாறாட்ட கைது... இதுவரை மாணவர்கள்... இப்போது மாணவி!
