தேனி: பெரியகுளம் சட்டமன்றத் தொகுதி திமுக சட்டமன்ற உறுப்பினராக இருப்பவர் சரவணக்குமார். இவர் பெரியகுளம் பகுதியில் வசித்து வருகிறார். கடந்த ஒன்றாம் தேதி எம்.எல்.ஏ சரவணகுமாரின் வாட்ஸ்ஆப்பிற்கு ஒரு வீடியோ கால் வந்ததுள்ளது. அந்த காலை அவர் எடுத்துப் பேசியபோது எதிரில் யாரும் இல்லாமல் சில வினாடிகளில் அந்த அழைப்பு துண்டிக்கப்பட்டுள்ளது.
அதனைத் தொடர்ந்து மதியம் மீண்டும் எம்.எல்.ஏ-வின் வாட்ஸ் ஆப்பிற்கு ஒரு வீடியோ மர்ம கும்பல் அனுப்பியுள்ளது. அதில் முன்பு வந்த வீடியோ கால் அழைப்பிலிருந்த எம்எல்ஏ-வின் முகத்தை பதிவு செய்து, ஒரு பெண் நிர்வாணத்துடன் இருப்பது போலவும், தகாத முறையில் எம்எல்ஏ-விடம் பேசுவது போலவும் சித்தரிக்கப்பட்டிருந்தது.
பின் சட்டமன்ற உறுப்பினரிடம் பணம் கேட்டு மிரட்டிய மர்ம கும்பல், பணம் கொடுக்க விட்டால் இந்த வீடியோ சமூக வலைத்தளங்களில் வெளியிட்டு விடுவதாக மிரட்டியுள்ளனர். இதனையடுத்து எம்எல்ஏ ஐந்தாயிரம் ரூபாய் பணத்தைக் கொடுத்துள்ளார். பின்னர் மீண்டும் கடந்த எட்டாம் தேதி, மர்ம கும்பல் காணொளியை வைத்து மிரட்டியதும் மேலும் ஒரு ஐந்தாயிரம் ரூபாய் கொடுத்துள்ளார்.
இதையும் படிங்க: திருச்சி ஐஸ்வர்யம் சிட் ஃபண்ட் மோசடி: பணத்தை மீட்கக்கோரி சிபிஎம்எல் ஆர்ப்பாட்டம்!
தொடர்ந்து அந்த மர்ம கும்பல் பணம் பறிக்கும் நோக்கத்தில் செயல்பட்டு வந்ததால், இது குறித்து சட்டமன்ற உறுப்பினர் சரவணகுமார் தேனி சைபர் கிரைம் (cyber crime) காவல் நிலையத்தில் புகார் அளித்துள்ளார். அப்புகாரின் பேரில் போலீசார் வழக்குப் பதிவு செய்து, எம்.எல்.ஏ. சரவணக்குமாரிடம், வீடியோ கால் வந்த தொலைப்பேசியின் எண், மர்ம கும்பலுக்குப் பணம் அனுப்பப்பட்ட வங்கிக் கணக்கு போன்றவற்றைக் கொண்டு விசாரணை நடத்தி வருகின்றனர்.
இதுகுறித்து விசாரணை நடத்திய சைபர் கிரைம் காவல்துறையினர், எம்.எல்.ஏவை மிரட்டிய கும்பலின் தொலைப்பேசி எண்ணை வைத்து அந்த மர்ம கும்பல் ராஜஸ்தானில் இருப்பதாக கண்டுபிடித்துள்ளனர். மேலும் மிரட்டல் விட்ட மர்ம கும்பலை பிடிக்க சைபர் கிரைம் காவல்துறையினர் தீவிரமாக செயல்பட்டு வருகின்றனர். இதுகுறித்து எம்.எல்.ஏ சரவணகுமாரிடம் கேட்டபோது, தற்போது இது குறித்துப் பேசினால் விசாரணை பாதிக்கப்படும் என்றும், குற்றவாளிகளைப் பிடித்த பிறகு இது குறித்து விளக்கம் அளிப்பதாகவும் தெரிவித்துள்ளார்.
இதையும் படிங்க: பாதாள சாக்கடைகளை சுத்தப்படுத்த மனிதர்களை ஈடுபடுத்தக்கூடாது என்றுகூறியுள்ளோம்: கோர்டில் அரசு தகவல்!
