தமிழ்நாடு மின் உற்பத்தி; பகிர்மான கழகத்தில் உள்ள 16 மின் பகிர்மான வட்டங்களில் ரூ.4.85 கோடி மதிப்பில் கணினிமயமாக்கப்பட்ட தானியங்கி மின்தடை பழுதுநீக்கும் மையம் செயல்படுத்தப்பட்டு வருகிறது.
அதன்படி மதுரை மண்டலத்திற்கு உட்பட்ட தேனி மின் பகிர்மான வட்டத்தில், ரூ.25.52 லட்சம் மதிப்பில் பிரத்யேக கணினிமயமாக்கப்பட்ட மின்தடை பழுது நீக்கும் மையத்தை இன்று துணை முதலமைச்சர் ஓ.பன்னீர்செல்வம் திறந்துவைத்தார். இது தேனி மின் பகிர்மான வட்டத்தில் உள்ள பெரியகுளம், தேவதானப்பட்டி, ஆண்டிபட்டி, சின்னமனூர், உத்தமபாளையம், கம்பம், போடி, ராசிங்கபுரம், தேவாரம், கூடலூர், சுருளிப்பட்டி ஆகிய பகுதிகளில் உள்ள நான்கு லட்சத்து 89 ஆயிரத்து 585 மின் இணைப்பு பயனீட்டாளர்கள் பயனடைவார்கள்.
மக்கள் தங்கள் மின் இணைப்பில் ஏற்படும் மின் தடை குறித்த விவரத்தை 1912 என்ற இலவச தொலைபேசி எண்ணை தொடர்பு கொண்டால், உடனடியாக கணினியில் பதிவு செய்யப்பட்டு சம்பந்தப்பட்ட வயர்மேன்களுக்கு தகவல் தெரிவிக்கப்பட்டு குறைந்த நேரத்தில் பிரச்னை சரி செய்யப்படும். மேலும் இந்த மையமானது 24 மணி நேரமும் செயல்படும் என மின்வாரிய அலுவலர்கள் தெரிவித்துள்ளனர்.
பின்னர் செய்தியாளர் சந்திப்பில் துணை முதலமைச்சரிடம், நிலவும் குடிநீர் பற்றாக்குறை குறித்த கேள்வி முன்வைத்தபோது, "தமிழ்நாட்டில் நிலவுகின்ற குடிநீர் பிரச்னையை சமாளிப்பதற்கு அந்தந்த மாவட்ட ஆட்சியர்கள் தங்கள் மாவட்ட குடிநீர் தேவைகள் குறித்து தெரிவித்ததை வைத்து போர்க்கால அடிப்படையில் நடவடிக்கைகள் எடுக்கப்பட்டு வருவதாக தெரிவித்தார்.
இந்த நிகழ்ச்சியில் மாவட்ட ஆட்சியர் பல்லவி பல்தேவ், அதிமுக கம்பம் சட்டப்பேரவை உறுப்பினர் ஜக்கையன், மின்வாரிய அலுவலர்கள் உள்ளிட்ட பலர் கலந்துகொண்டனர்.
