அம்மா மக்கள் முன்னேற்ற கழக துணை பொதுச்செயலாளர் டிடிவி தினகரன் இன்று தேனி மாவட்டத்தில் அமமுக வேட்பாளர்களை ஆதரித்து தேர்தல் பரப்புரையில் ஈடுபட்டார். இதில் தேனி மக்களவைத்தொகுதி வேட்பாளர் தங்க தமிழ் செல்வன், பெரியகுளம் (தனி) சட்டமன்ற தொகுதி வேட்பாளர் கதிர்காமு ஆகியோர்களை ஆதரித்து தேவதானப்பட்டி, பெரியகுளம் உள்ளிட்ட இடங்களில் வாக்கு சேகரித்தார்.
பெரியகுளம் மூன்றாந்தல் பகுதியில் பேசிய டிடிவி தினகரன், "பெண்ணாசையால் ஏற்பட்டது ராமாயணம், மண்ணாசையால் உண்டானது மகாபாரதம், மகாபாரதத்தில் துரியோதனன் அழிந்தது போன்று, நமக்கு துரோகம் செய்த துரியோதனக்கூட்டம் இந்த தேர்தலில் அழிந்து விடுவார்கள். அமமுகவை தேர்தல் ஆணையத்தில் பதிவு செய்யாததால் அங்கீகாரம் பெறாத கட்சி என்கிறார்கள். ஆனால் மக்களின் மனங்களில் அமமுக பதிவு செய்யப்பட்டுள்ளது.
தமிழ்நாட்டிற்கு துரோகம் செய்கின்ற மோடியை மக்கள் ஓட, ஓட விரட்டுவார்கள், அவருக்கு காவடி தூக்குகின்ற அம்மாவின் பெயரையும், சின்னத்தையும் கொண்டுள்ள போலிகளையும் தமிழ்நாடு மக்கள் ஓட ஓட விரட்டுவார்கள்.
ஆட்சியை பிடிப்பதற்காக பாஜகவின் கால்களை பிடித்து துணை முதலமைச்சர் பதவியை பெற்றவர் ஓபிஎஸ். வருங்கால இந்தியாவை தமிழ்நாடுதான் தீர்மானிக்க போகிறது. இந்தியாவின் பிரதமரை தமிழ்நாட்டிலிருந்து செல்கின்ற 39 சுயேச்சை வேட்பாளர்கள்தான் தீர்மானிப்பார்கள். சட்டமன்ற இடைத்தேர்தலில் 18 தொகுதிகளில் 6 தொகுதியில் வெற்றி பெறாவிட்டால் இந்த துரோக ஆட்சியாளர்கள் வீட்டுக்கு போய் பழைய தொழிலைதான் பார்க்க வேண்டும். இந்த சந்தர்ப்பத்தை பயன்படுத்தி திமுக காங்கிரஸ் கூட்டணி ஆட்சிக்கு வர முயற்சிக்கிறது. ஆனால் கடந்த 2014ஆம் ஆண்டு முதல் மக்கள் இந்த கட்சிகளை புறக்கணித்து வருகின்றனர். இந்த தேர்தலில் அவர்களை மக்கள் புறக்கணிப்பார்கள்" என்றார்.
