நீட் தேர்வில் ஆள்மாறாட்டம் செய்ததாக தேனி அரசு மருத்துவக்கல்லூரியில் முதலாம் ஆண்டு படித்து வந்த மாணவர் உதித்சூர்யா மீது குற்றச்சாட்டு எழுந்தது. இது குறித்து கல்லூரி முதல்வர் ராஜேந்திரன் அமைத்த விசாரணை கமிட்டியில் ஆள்மாறாட்ட மோசடி உறுதியானதையடுத்து மாணவர் உதித் சூர்யா குடும்பத்துடன் தலைமறைவாகினார்.
இதனையடுத்து கடந்த செப்டம்பர் 25 ஆம் தேதி ஆந்திர மாநிலம் கீழ் திருப்பதியில் வைத்து தலைமறைவாக இருந்த மாணவர் உதித்சூர்யா அவரது தந்தையான மருத்துவர் வெங்கடேஷ், தாய் கயல்விழி ஆகியோர் தேனி சிபிசிஐடி காவலர்களால் கைது செய்யப்பட்டனர். பின்னர் தேனி சிபிசிஐடி அலுவலகத்தில் எஸ்.பி.விஜயகுமார் தலைமையில் நடைபெற்ற விசாரணையில், நீட் தேர்வில் ஆள்மாறாட்டம் செய்ததை மாணவர் உதித் சூர்யா ஒப்புக்கொண்டார்.
இதனைத்தொடர்ந்து உதித் சூர்யா மற்றும் அவரது தந்தை வெங்கடேஷ் மீது சிபிசிஐடி காவலர்கள் கூட்டுச்சதி, ஆவணங்களை திருத்தி மோசடி செய்தல் உள்ளிட்ட மூன்று பிரிவுகளின் கீழ் வழக்குப்பதிவு செய்து கடந்த செப்டம்பர் 26ஆம் தேதி தேனி நீதித்துறை நடுவர் நீதிமன்றத்தில் நீதிபதி பன்னீர்செல்வம் முன்னிலையில் ஆஜர்படுத்தினர். அதில் தந்தை மகன் இருவரையும் 15நாள் நீதிமன்றக் காவலில் வைக்க நீதிபதி உத்தரவிட்டதையடுத்து மதுரை மத்திய சிறையில் அவர்கள் இருவரும் அடைக்கப்பட்டனர்.
