தேனி அருகே ரத்தினம் நகரில் உள்ள கருணாகரன் என்பவருக்குச் சொந்தமான காகிதம் மற்றும் எண்ணெய் ஆலை இயங்குகிறது.
இந்நிலையில், வழக்கம்போல் இந்த ஆலையில் தொழிலாளர்கள் நேற்று, இரவு நேரப்பணியில் ஈடுபட்டிருந்தபோது, எதிர்பாராதவிதமாக கொதிகலனில் தீ பற்றியுள்ளது. தொடர்ந்து தீ பரவியதால் அச்சமடைந்த தொழிலாளர்கள் தொழிற்சாலையைவிட்டு வெளியேறத்தொடங்கினர்.
தகவலறிந்த தீயணைப்புத் துறையினர் சம்பவ இடத்திற்கு விரைந்துவந்து தீயை அணைக்கப் போராடினர். ஆனால் ஆலை முழுவதும் காகிதம் மற்றும் எண்ணெய் இருந்ததால் கட்டுப்படுத்த முடியாத அளவிற்கு தீ கொளுந்துவிட்டு எரிந்தது.
இந்தப் பணியில் மாவட்டம் முழுவதும் உள்ள சுமார் 40-க்கும் மேற்பட்ட தீயணைப்பு வாகனங்கள் மற்றும் தனியார் தண்ணீர் லாரிகள் ஈடுபடுத்தப்பட்டன. தொடர்ந்து, தீயை அணைக்க தீயணைப்புத் துறையினர் போராடிவருகின்றனர்.
இந்த தீ விபத்தில் ஆலையில் பணியில் ஈடுபட்டிருந்த சுமார் 40-க்கும் மேற்பட்டோர் எந்தவித பெரிய காயமுமின்றி மீட்கப்பட்டனர். 10-க்கும் மேற்பட்டோர் சிறிய காயங்களுடன் தேனி அரசு மருத்துவமனையில் அனுமதிக்கப்பட்டுள்ளனர்.
