தஞ்சை பெரியகோயிலில் ஆண்டுதோறும் ஐப்பசி மாதம் பௌர்ணமியில் அன்னாபிஷேகம் நடைபெறுவது வழக்கம். அதேபோன்று இந்த ஆண்டும் ஐப்பசி மாத பௌர்ணமியையொட்டி இன்று அன்னாபிஷேகம் கோலாகலமாக நடைபெறவிருக்கிறது. இந்நிகழ்ச்சிக்காக பக்தர்கள் ஆயிரம் கிலோ அரிசியும் 1000 காய் கனிகளையும் வழங்கியுள்ளனர்.
பக்தர்கள் வழங்கிய பச்சரிசி சாதம் தயார் செய்து மாலையில் பெருவுடையாருக்கு அன்னாபிஷேகம் நடைபெறும். அதன்பின் பலவகை காய்கறிகளால் அலங்காரம் செய்யப்பட்டு ஆராதனை நடைபெறுகிறது. அதனைத்தொடர்ந்து பெருவுடையாருக்கு சாத்தப்பட்ட அன்னம் பொதுமக்களுக்கு பிரசாதமாக வழங்கப்படும்.
இதனையொட்டி அரியலூர் மாவட்டம் கங்கைகொண்ட சோழபுரத்தில் உள்ள பிரகதீஸ்வரர் கோயிலில் அன்னாபிஷேகம், மகா தீபாராதனை நடைபெற்றது. 108 மூட்டை அரிசியை சமைத்து அன்னமாக பெருவுடையாருக்கு சாத்தினர். இதனையடுத்து, லிங்கத்தின் மீது சாத்தப்பட்ட சாதம் பக்தர்களுக்கு பிரசாதமாக வழங்கப்பட்டது.
இந்நிகழ்ச்சியில், அரியலூர் மாவட்ட ஆட்சியர் ரத்னா, மாவட்டக் காவல் கண்காணிப்பாளர் சீனிவாசன், இந்து சமய அறநிலையத் துறையினர், தொல்லியல் துறையினர் உள்ளிட்டோர் கலந்துகொண்டனர்.
