பள்ளி வாகனம் கவிழ்ந்து விபத்து: 16 மாணவர்கள் காயம்!

சிவகங்கை: காரைக்குடி அருகே தனியார் பள்ளி வாகனம் கவிழ்ந்து விபத்துக்குள்ளானதில் காயமடைந்த 16 மாணவ, மாணவிகள் காரைக்குடி அரசு மருத்துவமனையில் அனுமதிக்கப்பட்டுள்ளனர்.

சிவகங்கை மாவட்டம் புதுவயல் நாட்டுச்சேரியை அடுத்த பெத்தானேந்தலில் இயங்கி வருகிறது தனியார் மெட்ரிக் பள்ளி. இன்று காலையில் அப்பள்ளிக்கு மாணவர்களை ஏற்றிக்கொண்டு வந்த தனியார் வேன், நாட்டுச்சேரி அருகே வளைவில் திரும்பியபோது, சாலையோர பள்ளத்தில் கவிழ்ந்து விபத்திற்குள்ளானது.

இதில் வேனில் பயணம் செய்த 16 மாணவர்களும் காயமடைந்தனர். அக்கம் பக்கத்தினர் மாணவர்களை மீட்டு, காரைக்குடி அரசு மருத்துவமனைக்கு அனுப்பி வைத்தனர்.

அங்கு அவர்களுக்கு சிகிச்சை அளிக்கப்பட்டு வருகிறது. விபத்து பற்றி வழக்குப்பதிவு செய்த சாக்கோட்டை காவல் துறையினர் விபத்துகான காரணம் குறித்து விசாரணை நடத்தி வருகின்றனர்.