மகளிரின் விளையாட்டுத் திறமையை ஊக்குவிக்கும் வகையில் ஆண்டுதோறும் கல்வியியல் கல்லூரிகளுக்கு இடையிலான விளையாட்டுப் போட்டிகள் நடத்தப்பட்டுவருகின்றன. அந்த வகையில் இன்று கல்வியியல் கல்லூரி மாணவிகளுக்கு மாவட்டளவிலான விளையாட்டுப் போட்டி சேலம் காந்தி விளையாட்டு மைதானத்தில் நடைபெற்றது.
இதில் நீளம் தாண்டுதல், உயரம் தாண்டுதல், ஈட்டி எறிதல், குண்டு எறிதல், 800 மீட்டர் தொடர் ஓட்டம் உள்ளிட்ட பல்வேறு வகையான போட்டிகள் நடைபெற்றன. இதில் கல்லூரி மாணவிகள் கலந்துகொண்டு தங்களின் தனித்திறமையை வெளிப்படுத்தினர்.
இந்தப் போட்டியில் சேலம் மாவட்டத்திலிருந்து 27 கல்லூரிகளைச் சேர்ந்த 500க்கும் மேற்பட்ட மாணவிகள் கலந்துகொண்டனர். இந்தப் போட்டியில் முதல் மற்றும் இரண்டாம் இடங்களைப் பிடிக்கும் மாணவிகள், அடுத்ததாக மாநிலளவில் நடைபெறவுள்ள விளையாட்டுப் போட்டியில் பங்கேற்க உள்ளனர். அதனால் மாணவிகளுக்கு இடையே கடுமையான போட்டி இருந்தது. இறுதியாக வெற்றிபெற்ற மாணவிகளுக்குப் பரிசுகளும் சான்றிதழ்களும் வழங்கப்பட்டன.
இதையும் படிங்க: எட்டரை மணிநேரம் சிலம்பம் சுற்றிய மாணவர்கள்!
