சேலம் மாவட்டம், கொண்டாலம்பட்டி பகுதியில், ’பிரியம்’ என்ற பெயரில் தனியார் மருத்துவமனை ஒன்று இயங்கி வருகிறது. இந்நிலையில், இங்கு வரும் கரோனா நோயாளிகளிடம் அரசு நிர்ணயித்த கட்டணத்தை விட அதிகம் வசூலிக்கப்படுவதாகவும், அரசு அனுமதித்த நோயாளிகள் எண்ணிக்கையை விட கூடுதல் நோயாளிகளை ஒரே அறையில் அடைத்து வைத்து சிகிச்சை வழங்குவதாகவும் தமிழ்நாடு சுகாதாரத் துறைக்கு புகார் வந்துள்ளது.
அதனடிப்படையில் பிரியம் மருத்துவமனையில் ஆய்வு செய்த மாநில சுகாதாரத்துறை அலுவலர்கள், மருத்துவமனை நிர்வாகத்தின் மீது கூறப்பட்ட புகார்கள் உண்மை எனக் கூறி பிரியம் மருத்துவமனைக்கு கரோனா சிகிச்சையளிக்க வழங்கப்பட்டிருந்த அனுமதியை ரத்து செய்தனர்.
அதேபோன்று இந்திய மெடிக்கல் கவுன்சிலில் பதிவு பெறாத மருத்துவர் நவீன் குமார் இம்மருத்துவமனையில் சிகிச்சையளித்து வந்ததும் கண்டுபிடிக்கப்பட்டது. இந்நிலையில், அவர் மீது பாதிக்கப்பட்ட நபர் ஒருவர் அளித்த புகாரின் பேரில் கொண்டலாம்பட்டி காவல் நிலையத்தில் வழக்குப் பதிவு செய்யப்பட்டது.
இது குறித்து பாதிக்கப்பட்ட நபர் வினோத் குமார் கூறுகையில், "எனது உறவினர் குமார், கரோனா தொற்றால் பாதிக்கப்பட்டு கடந்த மூன்றாம் தேதி பிரியம் மருத்துவமனையில் சிகிச்சைக்காக அனுமதிக்கப்பட்டார். சிகிச்சை முடிந்து 20ஆம் தேதி டிஸ்சார்ஜ் செய்யப்பட்டு, அவர் தற்போது வீட்டிலேயே தன்னை தனிமைப்படுத்திக்கொண்டுள்ளார்.
ஆனால், பிரியம் மருத்துவமனை நிர்வாகம் எங்களிடம் பல லட்சம் ரூபாய் வசூல் செய்திருப்பது அதிர்ச்சியளிக்கிறது. சிகிச்சைக்காக சேர்க்கப்பட்ட நாளில் மருத்துவமனை நிர்வாகத்தினர் கூறிய தொகையைவிட பன்மடங்கு கூடுதலாக அவர்கள் வசூலித்துள்ளனர். இதுவரை சிகிச்சைக்காக 11 லட்சத்து 65 ஆயிரம் ரூபாய் வசூல் கட்டணம் கட்டியுள்ளோம்.
ஒவ்வொரு நாளும் மருத்துவமனைக்கு செலுத்திய தொகை, மருத்துவமனை வழங்கிய சான்றுகள் என அனைத்தும் எங்களிடம் உள்ளது. சேலத்தில் சாதாரணமாகக் கிடைக்கக் கூடிய மருந்துகளை சென்னையில் கள்ளச்சந்தையில் தான் வாங்க வேண்டும் என்று கூறி அதற்கும் பல்லாயிரம் ரூபாய் வசூலித்து ஏமாற்றியுள்ளனர்.
இது தொடர்பாக மாவட்ட ஆட்சியரிடம் புகாரளித்துள்ளோம். விரைந்து தமிழ்நாடு சுகாதாரத் துறையும் மாவட்ட நிர்வாகமும் ஆய்வு செய்து எங்களிடம் கூடுதலாக வசூலிக்கப்பட்ட தொகையை திரும்பப் பெற்றுத் தர வேண்டும்" எனத் தெரிவித்தார்.
இதையும் படிங்க: 78 குண்டுகள் முழங்க பாடும் நிலா பாலுவின் உடல் நல்லடக்கம்
