சேலம் மாவட்டம் எடப்பாடி அருகே எல்லகுட்டூர் பகுதியைச் சேர்ந்தவர் ராஜா. இவரது மனைவி நவமணி. இவருக்கு கடந்த திங்கட்கிழமையன்று எடப்பாடியில் உள்ள தனியார் மருத்துவமனையில் குடலிறக்க அறுவைச் சிகிச்சை நடைபெற்றுள்ளது. அறுவைச் சிகிச்சை நடந்த அடுத்த நாள் நவமணியின் உடல்நிலை மோசமடைந்து மூச்சதிணறல் ஏற்பட்டுள்ளது. இதையறிந்த மருத்துவர்கள் மேல்சிகிச்சைக்காக சேலத்திலுள்ள தனியார் மருத்துவமனைக்கு அனுப்பி வைத்துள்ளனர்.
அங்கு அவரை பரிசோதித்த மருத்துவர்கள் குடலில் ஓட்டை விழுந்ததன் காரணமாக, நவமணிக்கு மூச்சுத்திணறல் ஏற்பட்டதாக தெரிவித்தனர். மேலும் குடல் ஒட்டையை சரிசெய்யும் மருத்துவ வசதி அங்கில்லாததால், கோவையில் உள்ள தனியார் மருத்துவமனைக்கு மருத்துவர்கள் பரிந்துரை செய்துள்ளனர். சேலம் மருத்துவர்களின் பரிந்துரையின் பேரில் நவமணியை அவரது உறவினர்கள் சிகிக்சைக்காக கோவைக்கு கொண்டு சென்றனர். அங்கு அவருக்கு அறுவைச் சிகிச்சை செய்யப்பட்டு தற்போது தொடர் சிகிச்சையில் உள்ளார்.
இதனால் ஆத்திரமடைந்த நவமணியின் உறவினர்கள் தவறான சிகிச்சையளித்த எடப்பாடியில் உள்ள தனியார் மருத்துவமனையை முற்றுகையிட்டு ஆர்ப்பாட்டம் நடத்தினர்.
இது குறித்து நவமணியின் கணவர் ராஜா கூறுகையில், " விவசாயியான நான் எனது மனைவியின் சிகிச்சைக்காக ஆறு லட்சம் ரூபாய் வரை கடன் வாங்கி செலவு செய்துள்ளேன். இதனால் பலசிரமங்களை சந்தித்து வருகிறேன். இதுபோன்ற ஒருசில தனியார் மருத்துவமனைகள் செய்யும் தவறால் என்னை போன்ற பல அப்பாவிகள் பாதிக்கப்படுகிறோம். வருங்காலங்களில் இதுபோல் நடக்காமலிருக்க தவறான சிகிச்சையளித்த மருத்துவர்கள் மீது நடவடிக்கை எடுக்க வேண்டும்" என்று அவர் தெரிவித்தார்.
இதையும் படிங்க:'தேசிய நெடுஞ்சாலையில் தீப்பிடித்து எரிந்த கார்'
