சேலம் மாவட்டம் பனமரத்துப்பட்டி பேரூராட்சி அடுத்த அடிக்கரையில் மதுரைவீரன் கோயில் உள்ளது. இந்தக் கோயிலுக்கு அருகில் கல்லாங்குத்து புறம்போக்கு நிலம் ஐந்து ஏக்கருக்கும் மேல் உள்ளது. இந்த நிலத்தை போலி ஆவணங்கள் மூலம் தனியார் மருத்துவமனையின் உரிமையாளர் ஆக்கிரமித்துள்ளார். மேலும் அங்கு 10 அடி உயரத்திற்கு மதில் சுவர் எழுப்பியுள்ளார். இது குறித்து அப்பகுதி மக்கள் கேட்டதற்கு அவர் மிரட்டிவருகிறார்.
இந்தப் புகார் குறித்து ஈடிவி பாரத்திடம் அப்பகுதி வாசி பொன். சரவணன் தெரிவித்ததாவது, "பனமரத்துப்பட்டி பேரூராட்சியின் இரண்டாவது வார்டு பகுதிக்குள்பட்டது மதுரைவீரன் கோயில். இந்தக் கோயிலுக்கு அருகில் கமலா என்ற பிரபல தனியார் மருத்துவமனையின் உரிமையாளருக்குச் சொந்தமான சுமார் 40 ஏக்கர் பண்ணை நிலம் உள்ளது.
அந்தப் பண்ணை நிலத்தை ஒட்டி ஐந்து ஏக்கருக்கு மேல் அரசுக்குச் சொந்தமான கல்லாங்குத்து புறம்போக்கு நிலம் உள்ளது. இந்த நிலத்தில் சுமார் 30 ஆண்டுகளுக்கு முன்பு வரை பொதுமக்கள் குடிசை போட்டு வசித்துவந்தனர்.
பின்னர் 1994ஆம் ஆண்டு ராமசாமி நாயக்கர், டாக்டர் சரவணன் ஆகியோர் ரவுடிகளைக் கொண்டும் துப்பாக்கி காட்டி மிரட்டியும் பொதுமக்களை விரட்டினர்.
உயிர் பயத்தில் 100-க்கும் மேற்பட்ட குடும்பங்கள் அங்கிருந்து வெளியேறினர். தற்போது அவர்கள் பனமரத்துப்பட்டி அடிக்கரையில் உள்ள பல்வேறு இடங்களில் குடிசை அமைத்து வசித்துவருகின்றனர். அரசிற்குச் சொந்தமான பாறைகள் நிறைந்த கல்லாங்குத்து புறம்போக்கு நிலத்தை தனியார் மருத்துவமனை உரிமையாளர் போலி ஆவணங்கள் மூலம் ஆக்கிரமித்து 10 அடி உயரத்திற்கு சுவர் எழுப்பியுள்ளார்.
மதில் சுவருக்கு உள்பகுதியில் இருக்கும் நிலத்தைச் சமன்படுத்தும் பணி நடைபெற்றுவருகிறது. இதனால் அங்கு இருக்கும் பாறைகள் வெடிவைத்து தகர்க்கப்படுகிறது. அப்போது அருகிலுள்ள குடிசைகளில் கற்கள் விழுந்து பொதுமக்களுக்கு காயம் ஏற்படுகிறது.
இதேபோல் மதில் சுவர் எந்த நேரமும் இடிந்துவிழும் நிலையில் இருக்கிறது. அப்படி மதில் சுவர் இடிந்து விழுந்தால் அருகில் இருக்கும் குடிசைகளில் விழுந்து உயிர் பலி ஏற்படுவதற்கான வாய்ப்பு உள்ளது.
தனியார் மருத்துவமனை உரிமையாளர் மீது நடவடிக்கை எடுக்கக் கோரியும், அதே இடத்தில் குடிசைகள் அமைக்க அனுமதி கேட்டும் மாவட்ட நிர்வாகத்தினரிடம் புகார் மனு அளித்தோம். அந்த மனு மீது மாவட்ட நிர்வாகம் எந்த நடவடிக்கையும் எடுக்கவில்லை" என்று தெரிவித்தார்.
மேலும் மதுரைவீரன் கோயில் பகுதியில் வசித்துவரும் பொன்னம்மாள் என்ற மூதாட்டி கண்ணீருடன் கூறியதாவது, "40 ஆண்டுகளுக்கு மேலாக இந்தப் பகுதியில் குடிசை போட்டு வாழ்ந்துவந்தோம்.
திடீரென்று ஒரு நாள் ரவுடிகளோடு வந்த சிலர் துப்பாக்கி காட்டி கொன்றுவிடுவோம் என்று மிரட்டி அங்கிருந்து எங்களை விரட்டிவிட்டனர். வேறு இடம் எங்களுக்கு இல்லாததால் இந்தப் பகுதியிலேயே குடிசை போட்டு வாழ்ந்துவருகிறோம். எங்கள் நிலைமையை அரசு புரிந்து உடனடியாக நடவடிக்கை எடுத்து, அதே பகுதியில் வீடுகள் கட்டித்தர வேண்டும்" என்றார்.
நீர்நிலைகளை ஆக்கிரமிக்கும் நபர்கள் பற்றிய செய்திகள் நாள்தோறும் வெளிவந்து கொண்டிருக்கின்றன. இந்த ஆக்கிரமிப்புகளை அரசு நிர்வாகம் கண்டுகொள்ளாமல் இருப்பதை நீதிமன்றங்களும் அவ்வப்பொழுது கண்டித்துவருகின்றன. ஆனாலும் ஆக்கிரமிப்புகள் தொடர்ந்து கொண்டுதான் இருக்கின்றன. மதுரைவீரன் பகுதி மக்களுக்கு விடிவு காலம் பிறக்குமா? என்பதைப் பொருத்திருந்து பார்க்கலாம்.
இதையும் படிங்க: 60 ஏக்கர் ஏரி 20 ஏக்கர் கழிவுநீர் குட்டையாக மாறிய அவலம்!
