சேலம் மக்களவைத் தொகுயில் அதிமுக சார்பில் போட்டியிடும் கே.ஆர்.எஸ். சரவணனை ஆதரித்து, தமிழ் மாநில காங்கிரஸ் தலைவர் ஜி.கே.வாசன் இன்று ஓமலூரில் தேர்தல் பரப்புரை மேற்கொண்டார். அப்போது அவர் செய்தியாளர்களிடம் கூறியதாவது:
பெரியார் சிலை மட்டுமல்ல எந்தத் தலைவரின் சிலை உடைக்கப்பட்டாலும் அவர்கள் எந்தக் கட்சியை சார்ந்தவர்கள் என்று பார்ப்பதை விட அவர்களை சமூக விரோதிகள் என்று கூறுவதே சரியானது. அப்படிப்பட்ட சமூக விரோதிகளை கைது செய்து சட்ட ரீதியான நடவடிக்கை எடுக்க காவல் துறை விரைந்து செயல்பட வேண்டும். அதேபோல வருமானவரித் துறையினர் அரசின் கட்டுப்பாட்டில் இல்லை. அவர்கள் அரசு கட்டுப்பாட்டிற்கு அப்பாற்பட்டு செயல்படுகின்றனர்.
வளர்ச்சியை மையப்படுத்தியே பாஜகவின் தேர்தல் அறிக்கை வெளியிடப்பட்டிருக்கிறது. இதற்கு நேர்மாறாக காங்கிரஸ் கட்சியின் தேர்தல் அறிக்கை வெளியிடப்பட்டுள்ளது. அதை மக்கள் ஏற்றுக் கொள்ளவில்லை. நடக்காத ஒன்றை நடத்திக்காட்டும் பொய்யை தேர்தல் அறிக்கையாக காங்கிரஸ் கட்சியினர் வெளியிட்டு மக்களை ஏமாற்ற நினைக்கிறார்கள்.
பாஜக வெளியிட்டுள்ள தேர்தல் அறிக்கை அனைத்து தரப்பு மக்களுக்கும் நம்பிக்கையை கொடுத்திருக்கிறது. நாட்டில் உள்ள ஏழை எளிய நடுத்தர மற்றும் விவசாய மக்களின் வாழ்வில் ஒளி ஏற்றி வைத்துள்ளது.
மீண்டும் மோடி தலைமையிலான ஆட்சி அமைந்தால் ஜிஎஸ்டி முறை மாற்றி அமைக்கப்படும். விவசாயிகளுக்கு 60 வயது கடந்தவுடன் ஓய்வூதியம் வழங்கப்படும். வட இந்தியாவில் காங்கிரஸ் வலுவிழந்துள்ளது. அதனால்தான் ராகுல் காந்தி கேரளாவில் போட்டியிடுகிறார்.
மக்கள் ஏற்றுக் கொள்ளும் வகையில் எந்த திட்டமாக இருந்தாலும் செயல்படுத்தப்படும். விவசாயிகளின் நலனுக்காகத்தான் ஏழை எளிய மக்களின் நலனுக்காகத்தான் பொங்கல் பரிசு ஆயிரம் ரூபாயை முதலமைச்சர் வழங்கினார். அதேபோல பல்வேறு நலத் திட்டங்கள் தொடரும் என்று தெரிவித்தார்.
