அரக்கோணம் இரட்டை கொலை வழக்கு: மேலும் ஐந்து பேருக்கு குண்டாஸ்!

ராணிப்பேட்டை: அரக்கோணம் அருகே இரட்டை கொலை வழக்கில் தொடர்புடைய ஏழு பேரைக் காவல் துறையினர் குண்டர் சட்டத்தில் கீழ் கைது செய்த நிலையில், மேலும் ஐந்து பேர் மீது குண்டர் சட்டம் பாய்ந்துள்ளது.

ராணிப்பேட்டை மாவட்டம், அரக்கோணத்தை அடுத்த சோகனூரில் மாற்று சமுதாயங்களைச் சேர்ந்த இரு பிரிவினருக்கு இடையே மோதல் நடந்தது. அதில் அக்கிராமத்தைச் சேர்ந்த அர்ச்சுனன் (26), சூர்யா (26) ஆகிய இருவரும் கத்தி, கம்பிகள் உள்ளிட்ட ஆயுதங்களால் பலமாகத் தாக்கப்பட்டு சிகிச்சைப் பலனின்றி உயிரிழந்தனர்.

மதன், வல்லரசு, சௌந்தர்ராஜ் ஆகியோர் படுகாயங்களுடன் திருத்தணி அரசு மருத்துவமனையில் சிகிச்சை பெற்று வீடு திரும்பினர். தமிழ்நாடு முழுவதும் அதிர்வலைகளை ஏற்படுத்திய இந்த சம்பவத்தில் 13 பேரை காவல் துறையினர் கைது செய்தனர். அவர்களில் மதன் (34), சத்யா (32), மூக்கன் (எ) ராஜசேகர் (28), அஜித் (24), கார்த்திக் (22), புலி (20), சூர்யா (20) ஆகிய ஏழு பேரை கடந்த மே.7-ஆம் தேதி குண்டர் தடுப்பு சட்டத்தில் கைது செய்தனர்.

தொடர்ந்து, இதே வழக்கில் தொடர்புடைய அரக்கோணம் பெருமாள்பேட்டையைச் சேர்ந்த சிவா (32), குமரன் (24), விக்கி (எ) விக்னேஷ் (23), மேகவர்ணன் (21), நந்தகுமார் (20), ஆகிய ஐந்து பேரையும் நேற்று (மே. 08) ராணிப்பேட்டை மாவட்ட காவல் கண்காணிப்பாளர் சிவக்குமார் பரிந்துரையின் பேரில், மாவட்ட ஆட்சியர் கிளாட்ஸ்டன் புஷ்பராஜ் குண்டர் சட்டத்தில் கைது செய்ய உத்தரவிட்டார். அதன்படி இளைஞர்கள் ஐந்து பேரை காவல் துறையினர் குண்டர் சட்டத்தில் கைது செய்தனர்.

இதையும் படிங்க:அரக்கோணம் இரட்டைக் கொலை வழக்கில் ஏழு பேருக்கு குண்டாஸ்!