கடந்த நவம்பர் மாதம் நேபாளில் நடைபெற்ற தெற்காசிய விளையாட்டுப் போட்டியில் வாலிபால் பிரிவில் 8 நாடுகள் பங்கேற்றன. இப்போட்டியின் இறுதியில் இந்தியா, பாகிஸ்தான் அணிகள் மோதின. இப்போட்டியில் இந்திய வாலிபால் அணியின் கேப்டனாக புதுக்கோட்டை மாவட்டம்,கோட்டைக்காடு பகுதியைச் சேர்ந்த ஜெரோம் வினித் இந்திய அணியை வழிநடத்தினார்.
அதுமட்டுமின்றி இறுதிப் போட்டியில் இந்திய அணியை வெற்றி பெறச் செய்து தெற்காசிய போட்டியில் இந்தியாவிற்கு தங்கப்பதக்கத்தினையும் பெற்று தந்தார். இதனையடுத்து ஜெரோம் வினித்துக்கு இன்று புதுக்கோட்டை மாவட்ட நிர்வாகத்தின் சார்பில் மாவட்ட ஆட்சியர் உமாமகேஸ்வரி பொன்னாடை அணிவித்து பாராட்டு தெரிவித்தார்.
இந்த நிகழ்ச்சிக்கு பின் செய்தியாளர்களை சந்தித்த வினித், ”இந்தியாவிற்காக விளையாடியது மிகவும் மகிழ்ச்சியாக இருக்கிறது. கிரிக்கெட் அளவிற்கு மக்களிடம் வாலில்பால் வரவேற்பை பெறாததுக்கு அரசாங்கத்தை குறை கூற முடியாது. மாணவர்கள் ஆர்வத்துடன் அனைத்து போட்டிகளிலும் கலந்துகொள்ள வேண்டும். அதற்கு அனைத்து ஊர்களிலும் மைதானம் கட்டாயம் அமைக்க வேண்டும்.
இப்போது இருக்கும் குழந்தைகளை விளையாடுவதற்கு பெற்றோர்கள் அனுமதிப்பதில்லை. கல்வியை சுமையாக்கி வீட்டுக்குள்ளேயே வைத்துவிடுகின்றனர் . விளையாட்டு என்பது கண்டிப்பாக வாழ்க்கைக்கு தேவை” என்றார்.
இதையும் படிங்க:கொல்கத்தா கால்பந்து மைதானத்தில் சிஏஏவுக்கு எதிராக வலுப்பெற்ற போராட்டம்
