அண்ணன் ராகுல் காந்தி!

புதுக்கோட்டை: குக்கிராமத்தில் தொடங்கப்பட்ட வில்லேஜ் குக்கிங் யூடியூப் சேனல் ராகுல் காந்தியின் பங்கேற்பால், உலக அளவில் இன்று பேசப்பட்டு கொண்டிருக்கிறது. ராகுலுடன் சேர்ந்து உணவு சமைத்து, ஒன்றாக உட்கார்ந்து உண்ட ஆச்சரியத்திலிருந்து இன்னும் மீளவே இல்லை என்கின்றனர் வில்லேஜ் குக்கிங் சேனல் குழுவினர்.

புதுக்கோட்டை மாவட்டம் அறந்தாங்கி அருகே உள்ள சின்னஞ்சிறிய கிராமமான சின்ன வீரமங்கலத்தை சேர்ந்தவர்கள், சுப்பிரமணி, முருகேசன், அய்யனார் ஆகியோர். அண்ணன் தம்பிகளான இவர்கள் சேர்ந்து கடந்த 2018 ஆம் ஆண்டு ஏதாவது ஒரு யூடியூப் சேனல் ஆரம்பிக்கலாம் என நினைத்தபோது, அந்த ஊரின் நல்ல சமையல்காரரான பெரியவர் பெரியதம்பியை பார்த்துள்ளனர். பின்னர் முத்துமாணிக்கம், தமிழ்ச்செல்வன் என இன்னும் இருவரை கூட சேர்த்துக்கொண்டு தொடங்கப்பட்டதுதான் ‘வில்லேஜ் குக்கிங் சேனல்’.

ஆரம்பத்தில் சிலர் மட்டுமே பார்த்து வந்த இந்த யூடியூப் சேனல், கஜா புயல் முடிந்து கிளம்பிய ஈசல்களை வறுத்து தங்களது யூடியூப் சேனலில் பதிவிட்டதால் அதனை பல்லாயிரம் பேர் பார்த்து பிரபலமானது. அதனைத்தொடர்ந்து வாரம் இரு சமையல் பதிவுகள் என பல புதுமைகளை சமையலிலும், செய்கையிலும் காண்பித்து வந்தனர். இதில் சமைக்கும் பெரியவர் முதல் அனைவரும் வித்தியாசமான உடல்மொழியோடு, ஏற்ற இறக்க உச்சரிப்புகளோடு பேசுவது அனைத்து தரப்பினரையும் வெகுவாகக் கவர்ந்தது.

'ஆச்சரியத்திலிருந்து இன்னும் மீளவே இல்லை'

இவ்வாறாக ஊர் ஊராக பயணித்து சமைத்து பதிவிட்டு வந்தவர்களுக்கு ஒருநாள், கரூர் காங்கிரஸ் எம்பி ஜோதிமணியிடமிருந்து ஃபோன் வந்தது. ’ராகுல்காந்தியிடம் அறிமுகப்படுத்தி வைக்கிறேன். அவருடன் ஃபோட்டோ எடுத்துக் கொள்கிறீர்களா?’ என்று கேட்டுள்ளார் ஜோதிமணி. ஆனால், ராகுல்காந்தியுடன் ஃபோட்டோ எடுத்துக்கொள்வதைவிட அவருக்கு சமைத்து கொடுக்க விரும்புவதாக தெரிவித்தனர் அவர்கள்.

கரூர் விரைந்தது வில்லேஜ் குக்கிங் சேனல் குழு. இடத்தை தேர்வு செய்து தயாராகியிருந்தனர் பெரியவரும் பேரன்களும். ராகுல் காந்தி பிரச்சாரத்திற்காக கருர் வந்திருப்பதால், ஒருவேளை அவர் வர இயலவில்லை என்றாலும் தவறாக நினைத்துக் கொள்ள வேண்டாம் என்றிருக்கிறார் ஜோதிமணி எம்பி. மகிழ்ச்சியில் திளைத்திருந்தவர்களுக்கு அதுமுதல் ஏமாற்றம் எட்டிப்பார்த்திருக்கிறது. பின்னர் முன்னரே தீர்மானித்தப்படி காளான் பிரியாணி செய்யத்தொடங்கினர். அப்போது திடீரென வந்த ஒரு காரில் சாதாரண பேண்ட், டி-ஷர்ட்டில் வந்திறங்கினார் ராகுல். வந்தவர் நேராக தனக்கு வந்து கை கொடுத்ததும் மலைத்துப் போய் விட்டதாக தெரிவிக்கிறார் பெரியதம்பி. என் பேரன்களைப் போலவே தன்னிடமும் ராகுல் காந்தி பழகியதாக கூறுகிறார் அவர்.

அண்ணன் ராகுல் காந்தி!

பின்னர் அவர்களுடன் சேர்ந்து சமையல் செய்யத் தொடங்கினார் ராகுல். பெரியவர் பெரியதம்பி எப்படியான ஏற்ற உச்சரிப்போடு பேசுவாரோ அதே போன்று ராகுல் காந்தியும், வெங்காயம், தயிர் உள்ளிட்டவைகளை தமிழில் பேசி அவர்களை குதூகலப்படுத்தினார். மேலும் ராகுல்காந்தியே தயிர் பச்சடியை தன் கையால் கலந்ததோடு, தங்களுடன் அமர்ந்து நீண்ட நேரம் உரையாடி காளாண் பிரியாணியை உண்டு மகிழ்ந்த ஆச்சரியத்திலிருந்து இன்னும் மீள முடியவில்லை என்கிறார் சுப்பிரமணி.

இந்தியாவின் மிகப்பெரிய தலைவர் என்ற சிறு எண்ணமும் இல்லாமல், தங்களுடன் சாதாரண ஒருவராக ஒன்றாக அமர்ந்து பேசி தங்களுக்கு ஓர் அங்கீகாரத்தை வழங்கிவிட்டு ராகுல் சென்றிருப்பதாக கூறுகிறார் அய்யனார். அமெரிக்காவில் தனது நண்பரிடம் கூறி ஒரு சமையல் நிகழ்ச்சிக்கு ஏற்பாடு செய்வதாகவும் உறுதியளித்துள்ள ராகுலை, வார்த்தைக்கு வார்த்தை அண்ணன் ராகுல் என்றே கூறுகிறார் அய்யனார்.

சாதாரண நிலையில் இருந்து இரண்டே ஆண்டுகளில் தங்களின் கடின உழைப்பால் முன்னேறிய இக்குழுவினருக்கு, ராகுல் காந்தியுடனான நிகழ்ச்சிக்குப்பிறகு, உலகம் முழுவதும் பார்வையாளர்கள் பெருகியுள்ளனர். அதாவது சில ஆயிரங்களில் இருந்த வில்லேஜ் குக்கிங் சேனலின் தற்போதைய சப்ஸ்கிரபர்களின் கணக்கு, 7.33 மில்லியன். அதாவது 70 லட்சத்திற்கும் மேல்.

இதையும் படிங்க: மியான்மரில் ராணுவ ஆட்சி: ஆங் சான் சூகி கைது!