புதுக்கோட்டை மாவட்டம் நெம்மேலி பட்டியை சேர்ந்தவர் அனுராதா, காவல்துறை ஆய்வாளராக பணிபுரிந்து வருகிறார். அனுராதா, சகோதரர் மாரிமுத்துவுடன் இணைந்து ராவணன் என்ற ஜல்லிக்கட்டு காளையை கடந்த மூன்று வருடங்களாக வளர்த்து வந்தார்.
கடந்த ஆண்டு அலங்காநல்லூர், அவனியாபுரம், பாலமேடு ஜல்லிக்கட்டு போட்டிகளில் கலந்துகொண்ட ராவணன், ஜல்லிக்கட்டு களத்தில் காளையர்களை திணறடித்து முதல் பரிசு பெற்றது. பல்வேறு ஜல்லிக்கட்டு போட்டிகளில் கலந்துகொண்டு பல பரிசுகளைப் பெற்று, காளையர்களுக்கு சிம்ம சொப்பனமாக விளங்கி வந்தது.
இந்நிலையில், கடந்த வாரம் புதுக்கோட்டை சொலகன் பட்டியில் நடைபெற்ற ஜல்லிக்கட்டு போட்டியில் கலந்துகொண்டு வீரர்களை திணறடித்து களத்தை விட்டு ஓடிய ராவணனை அன்று முதல் காணவில்லை. பல்வேறு தரப்பினரும் ராவணனை தேடி வந்த நிலையில், தச்சன்குறிச்சி அருகே ஜல்லிக்கட்டு காளை இறந்து கிடப்பதாக தகவலறிந்து உரிமையாளர் மாரிமுத்து உட்பட பலரும் அங்கு சென்றனர்.
உடனடியாக ராவணனை மீட்டு சோதனை செய்தபோது, காளை பாம்பு தீண்டி உயிரிழந்திருப்பது தெரியவந்தது. இதனைத் தொடர்ந்து தங்களது சொந்த ஊரான நெம்மேலி பட்டிக்கு ராவணனை லாரியில் ஏற்றி ஊர்வலமாக கொண்டு சென்றனர்.
ராவணனின் இறப்பை கண்ட பலர் கதறி அழுத காட்சி காண்போரை கண்கலங்க செய்தது. அதன் பின்னர் சுற்றுவட்டாரப் பகுதியிலுள்ள ஜல்லிக்கட்டு ஆர்வலர்கள் ராவணனுக்கு மாலை அணிவித்து மரியாதை செய்தனர். மனிதர்களைப் போன்றே இறுதி சடங்கு நடத்தப்பட்டு ராவணன் அடக்கம் செய்யப்பட்டது.
தமிழ்நாடு முழுவதும் பெரும் வரவேற்பைப் பெற்ற காளையானதால், பலரும் சமூக வலைதளங்களில் புகைப்படம், காணொலி போன்றவற்றை பதிவிட்டு இரங்கல் தெரிவித்து வருகின்றனர். ராவணனின் மறைவால் அந்தக் கிராமமே சோகத்தில் மூழ்கியுள்ளது.
இதையும் படிங்க: சசிகலாவை நேரில் சந்தித்தார் தனியரசு எம்எல்ஏ
