புதுக்கோட்டை மாவட்டம் நற்சான்றுபட்டியில் பாஜக மாநிலத் தலைவர் எல். முருகன் செய்தியாளர்களைச் சந்தித்தார். அப்போது அவர் கூறுகையில், ''பாஜக வரும் சட்டப்பேரவைத் தேர்தலுக்குத் தயாராகும் பணியில் ஈடுபட்டுள்ளது. நாங்கள் தேர்தலுக்குத் தயாராகத்தான் உள்ளோம்.
வேளாண் சட்டத்திற்கு ஆதரவாக அதில் உள்ள அம்சங்களை கிராமம் கிராமமாக பாஜக சார்பில் எடுத்துக் கூறப்பட்டுவருகிறது. பாஜகவின் பலம் பொருந்திய தொகுதிகள் என்னென்ன என்பது குறித்து தேர்ந்தெடுத்து அந்தப் பகுதியில் அதிக கவனம் செலுத்தப்பட்டுவருகிறது.
பாஜக கூட்டணியின் பிரதான கட்சியான அதிமுகவின் 2021 சட்டப்பேரவைத் தேர்தலுக்கான முதலமைச்சர் வேட்பாளராக எடப்பாடி பழனிசாமி தேர்ந்தெடுக்கப்பட்டதற்குப் பாராட்டுகளைத் தெரிவித்துக் கொள்கிறேன்.
இந்தியை யாரும் திணிக்கவில்லை. மூன்றாவதாக ஒரு மொழியை கற்றுக் கொள்வதற்கு மக்கள் தயாராக உள்ளனர். தமிழ்நாட்டில் ஏற்கனவே உருது, மலையாளம், தெலுங்கு கற்றுக் கொடுக்கும் பள்ளிகள் உள்ளன.
உத்தரப் பிரதேசத்தின் ஹத்ராஸ் சம்பவம் மிகவும் கண்டிக்கப்பட வேண்டியது. அதில் அம்மாநில அரசு சார்பாக சிறப்பு விசாரணை நடத்தப்பட்டுவருகிறது. சிபிஐ விசாரணைக்கும் உத்தரவிடப்பட்டுள்ளது.
உத்தரப் பிரதேச சம்பவத்திற்காகப் போராடும் திமுக உள்ளிட்ட கட்சிகள் தமிழ்நாட்டின் செங்கல்பட்டு மாவட்டத்தில் பட்டியலின இளம்பெண் ஒருவர் பாலியல் வன்கொடுமை செய்யப்பட்டு உயிரிழந்தபோது ஏன் போராடவில்லை?
மத்திய அரசு திட்டங்களான கிசான் திட்டம், வீடு கட்டும் திட்டம் ஆகியவற்றில் பல்வேறு முறைகேடுகள் நடந்துள்ளன. அதில் ஒரு சில இடைத்தரகர்கள், அலுவலர்கள் இதுபோன்ற முறைகேட்டில் சம்பந்தப்பட்டுள்ளனர். அவர்கள் மீது நடவடிக்கை எடுக்க வேண்டும்.
கடந்த சட்டப்பேரவைத் தேர்தலின்போது 90 இடங்களில் வெற்றி, தோல்வியை நிர்ணயிக்கும் சக்தியாக பாஜக இருந்துள்ளது. அதனைக் கருத்தில்கொண்டு இந்தச் சட்டப்பேரவைத் தொகுதிகளைப் பெறுவதில் பாஜக கவனம் செலுத்தும்.
2021 சட்டப்பேரவைத் தேர்தலில் பாஜக இடம்பெறும் கூட்டணிதான் வெற்றிபெறும். அதிமுக மீண்டும் ஆட்சி அமைக்கும்'' என்றார்.
இதையும் படிங்க: மரண அச்சுறுத்தல் மத்தியில் வாழ்ந்துவருகிறோம் - ஹத்ராஸ் குடும்பம் அச்சம்!
