பெரம்பலூர்: பெரம்பலூர் புதிய பேருந்து நிலையம் பகுதியில் தமிழ்நாடு ஆளுநர் ஆர்.என். ரவியை நீக்கம் செய்யக் கோரி குடியரசுத் தலைவரை வலியுறுத்தி மதிமுக சார்பில் கையெழுத்து இயக்கம் நடைபெற்றது. இந்த கையெழுத்து இயக்கத்தினை திமுக துணை பொதுச் செயலாளரும், நாடாளுமன்ற உறுப்பினருமான ஆ.ராசா தொடங்கி வைத்தார்.
பின்னர் நிகழ்வில் பேசிய ஆ.ராசா, தமிழ்நாடு ஆளுநர் ஆர்.என்.ரவி பதவி விலக வேண்டும் என கூறினார். தொடர்ந்து கையெழுத்து இயக்கத்திற்கு வருகை புரிந்தவர்கள் அனைவரும் கையெழுத்துப் போடுமாறு கேட்டு கொண்டார். இந்த கையெழுத்தானது அரசியலுக்காக மட்டுமல்ல மற்றும் ஆட்சி அதிகாரத்திற்கு மட்டுமல்ல எனவும் தெரிவித்தார்.
மேலும், “திராவிட சித்தாந்தம் இன்னும் 100 ஆண்டுகள் வாழ வேண்டும் என்றால் ஆளுநர் ஆர்.என்.ரவி ஒழிந்தே தீர வேண்டும் என்ற முடிவை தமிழ்நாடு மக்கள் எடுக்க வேண்டும் என்பதற்காக கையெழுத்து இயக்கம் தொடங்கப்பட்டது. மேலும் கடந்த சில நாட்களுக்கு முன் மத்திய உள்துறை அமைச்சர் அமித்ஷா தமிழ்நாட்டிற்கு வருகை புரிந்தார். அப்போது அவர் பேசுகையில் தமிழரை பிரதமராக்குவோம் என்று சொன்னார். நம்முள் ஒரு தமிழன் இந்தியாவிற்கு பிரதமராக வந்தால் நல்லது” என்றார்.
இதனைத் தொடர்ந்து, நாங்கள் 2024இல் என்ன செய்ய போகிறோம் என்பதை தமிழ்நாடுதான் முடிவெடுக்கும். யார் பிரதமர் என்பதையும் நம்முடைய முதலமைச்சர்தான் முடிவெடுப்பார். ஒரு வேளை தமிழ்நாட்டில் இருந்து பிரதமர் வந்தால், அடுத்த நாள் ஆளுநர் மாளிகையில் ஆர்.என்.ரவிக்கு வழியனுப்பு விழா இருக்காது. தானாகவே ஆளுநர் ஒடக் கூடிய சூழலை ஆட்சி மாற்றத்திற்கு பிறகு உருவாக்குவோம். அதற்கு அடித்தளம்தான் இந்த கையெழுத்து இயக்கம்.
ஆளுநர் சட்டமன்றத்தை மதிக்க மாட்டார். மேலும், அரசியல் சட்டத்தில் சொல்லப்பட்டுள்ள மதச்சார்பின்மைக்கு எதிராக பேசுவார். இந்திய மக்களாகிய நாம் ஒரு இந்திய குடியரசை ஜனநாயக, சமதர்ம மற்றும் மதச்சார்பற்ற நாடாக அமைத்து இருக்கிறோம். இது ஆளுநருக்கும், முதலமைச்சருக்கும் இடையில் நடைபெறும் போர் என்று கருதாமல், இது இரண்டு சித்தாந்தங்களுக்கு இடையில் நடைபெறுகின்ற போர் என கருத வேண்டும்.
திராவிட சித்தாந்தத்தின் அடித்தளமாக விளங்கக் கூடிய திமுகவின் இந்த ஆட்சி திராவிட மாடல் ஆட்சி. திராவிட சிந்தனைக்கு எதிராக இருக்கக் கூடிய ஆரிய சிந்தனை உள்ள ஒருவர், இங்கே வந்து தமிழ் மொழியை, கலாச்சாரத்தை அழிக்க வேண்டும் என்ற விநோதம் நடந்து வந்துள்ளது. மேலும், அரசியல் சட்டத்தில் சொல்லப்படாத அதிகாரங்களை எல்லாம் யார் அமைச்சராக இருக்க வேண்டும், யார் அமைச்சராக இருக்க கூடாது என்பதை முடிவு செய்வது முதலமைச்சர். ஆனால் ஆட்சி அதிகாரத்திலும் குறுக்கே வந்து கருத்து சொல்கிறார்.
சுமூகமான நடைமுறை, சுமூகமான நிர்வாகம் நடைபெற விடக் கூடாது என்பதற்காகவும், அப்படி சுமூகமான நிர்வாகம் நடைபெற்றால் முதலமைச்சருக்கு நல்ல பெயர் வந்து விடும், திராவிட சித்தாந்தம் ஓங்கும். திராவிட சித்தாந்தம் ஓங்கினால் காவியை பரப்ப முடியாது. ஆகையால் ஆளுநர், பிரதமர் மற்றும் அமித்ஷா ஆகியோர்களுடன் கூட்டணியில் ஈடுபட்டு காவி அரசியல் செய்யும் இந்த ஆளுநரை தூக்கி எறியும் நாள் வெகு விரைவில் இல்லை” என தெரிவித்தார்.
இதையும் படிங்க:Vijay: வா தலைவா வா.. சட்டமன்றத்தின் ஆளுமையே.. ஊரெல்லாம் விஜய் ரசிகர்கள் போஸ்டர்!
