பெரம்பலூர்: சுமார் 12 கோடி ஆண்டுகளுக்கு முன்பே அழிந்துபோன கடல்வாழ் உயிரினமான அமோனைட்ஸ்களின் எச்சங்கள் பெரம்பலூரில் அதிகளவில் கண்டறியப்பட்டுள்ளன. எனவே, இந்த அமோனைட்ஸ்கள் குறித்து அனைவரும் அறிந்துகொள்ளும் விதமாக ‘அமோனைட்ஸ் மையம்’ என்ற ஒன்று அமைக்கப்பட்டு வருகிறது.
பெரம்பலூர் வட்டாட்சியர் அலுவலக வளாகத்தில் உள்ள நூற்றாண்டு கட்டடத்தில் அமைக்கப்பட்டு வரும் அமோனைட்ஸ் மையத்தினை இன்று மாவட்ட ஆட்சித்தலைவர் ஸ்ரீவெங்கடபிரியா நேரில் பார்வையிட்டு ஆய்வு செய்தார்.
பின்னர் செய்தியாளர்களைச் சந்தித்த ஸ்ரீவெங்கடபிரியா, “சுமார் 12 கோடி ஆண்டுகளுக்கு முன்பே அழிந்துபோன கடல்வாழ் உயிரினமான அமோனைட்ஸ் எனப்படும் நத்தை போன்ற தோற்றமுடைய உயிரினங்களின் படிவங்கள், நமது பெரம்பலூர் மாவட்டத்தில் அதிக அளவில் கிடைக்கிறது.
பெரம்பலூர் வட்டாட்சியர் அலுவலக வளாகத்தில் அமோனைட்ஸ் படிமங்களை பொதுமக்களுக்கு காட்சிப்படுத்தும் வகையில், அதற்காக பிரத்யேக மையமும் அமைக்கப்பட்டு வருகிறது. தலைக்காலி என்னும் வகையினைச் சேர்ந்த அமோனைட்ஸ்கள், பலகோடி ஆண்டுகளுக்கு முன்பே அழிந்துவிட்டன. இந்த கடல்சார் உயிரினங்களின் படிமங்கள், பெரம்பலூர் மாவட்டத்தில் உள்ள காரை, கொளக்காநத்தம், பிலிமிசை உள்ளிட்ட பல்வேறு பகுதிகளில் கிடைக்கின்றது.
இவை தவிர, பெரம்பலூர் மாவட்டத்தில் 112 வகையான தொல்லுயிர் எச்சங்கள் கிடைக்கின்றன. அமோனைட்ஸ்களின் முழு உருவம் எவ்வாறு இருக்கும் என்பதை பொதுமக்கள் அறிந்து கொள்ள ஏதுவாக, அந்த உயிரினத்தின் மாதிரி தோற்றம் இந்த மையத்தில் காட்சிப்படுத்தப்பட்டுள்ளது. அதுமட்டுமல்லாது, பெரம்பலூர் மாவட்டத்தின் பல்வேறு பகுதிகளில் இருந்து கிடைக்கப்பெற்ற 300 வகையான தொல்லுயிர் எச்சங்களும் இங்கு காட்சிப்படுத்தப்பட உள்ளன.
அமோனைட்ஸ் குறித்து அறிந்து கொள்ள விரும்புபவர்களுக்கும், ஆய்வாளர்களுக்கும் இந்த மையம் பெரிதும் பயனுள்ள வகையில் இருக்கும். பொதுமக்களுக்கும், குழந்தைகளுக்கும் இந்த மையம் சிறந்த பொழுதுபோக்கு மையமாகவும் விளங்கும். தமிழ்நாடு அளவில் அமோனைட்ஸ்களுக்கென்று பிரத்யேக அருங்சாட்சிகயம் அமைக்கப்படுவது இதுவே முதல்முறையாகும்.
மிக விரைவில் இதன் பணிகள் முடிவடைந்து, இந்த அமோனைட்ஸ் மையம் பொதுமக்களின் பயன்பாட்டிற்கு திறந்து வைக்க நடவடிக்கை எடுக்கப்படும்” எனத் தெரிவித்தார்.
இதையும் படிங்க: கைவண்ணத்தைக் காட்டிய காஞ்சிபுர இளைஞருக்கு ஆனந்த் மகேந்திரா பாராட்டு!
