நாமக்கல்லில் இன்று கவிப்பேரரசு வைரமுத்து எழுதிய தமிழாற்றுப்படை நூலின் அறிமுக விழா நடைபெற்றது. இவ்விழாவில், வைரமுத்து கலந்துகொண்டு நூலினை வெளியிட, அதனை மாவட்ட காவல் கண்காணிப்பாளர் அருளரசு பெற்றுக்கொண்டார்.
அப்போது உரையாற்றிய வைரமுத்து, ”உலகில் உள்ள செம்மொழி பட்டியலில் பழமை வாய்ந்த தமிழும், சீன மொழியும் மட்டுமே வழக்கத்தில் உள்ளது. பிறமொழி சொற்கள் தமிழுக்கு வந்தாலும் அதனை தமிழாக்கம் செய்து உச்சரிக்க வேண்டும். 69 ஆண்டுகளில் இந்திய அரசியலமைப்பு சட்டம் 101 முறை திருத்தப்பட்டுள்ளது, ஆனால் 3 ஆயிரம் ஆண்டுகளுக்கு முன்பு தமிழன் எழுதிய தொல்காப்பியம் இதுவரை ஒருமுறைகூட திருத்தப்படவில்லை. ஒளியை விட வேகமாக செல்வது சொல் எனவும் அந்த சொல்லை நாம் எவ்வாறு பயன்படுத்துகிறோம் என்பதே முக்கியம். ஒரு சொல் ஒரு ஒரு லட்சம் உயிர்களை அழிக்கும் வல்லமையும், அதே சமயம் ஒரு லட்சம் உயிர்களை காக்கும் வல்லமையும் பெற்றது.
நாம் தமிழை இழந்தால் நம் நிலத்தை இழக்க நேரிடும். நிலத்தை இழக்க நேரிட்டால் நாம் எங்கே செல்வது என்பது கேள்விக்குறியாகிவிடும். காற்று, சுவாசம் இல்லாமல் உயிர் வாழ முடியாது என்று மூன்றாயிரம் ஆண்டுகளுக்கு முன்பே திருமந்திரம் மூலம் அறிவியல் உண்மையை உலகுக்கு எடுத்துக் கூறியவர் திருமூலர் என்ற தமிழர் என்பதை நாம் ஒருபோதும் மறந்துவிட கூடாது. தயவுசெய்து அனைவரும் தங்களது குழந்தைகளுக்கு தமிழிலேயே பெயர் சூட்டுங்கள்” எனக் கூறினார்.
பின்னர் செய்தியாளர்களிடம் பேசிய வைரமுத்து, "இந்தி மொழி இந்தியாவை இணைக்கும் மொழி என்ற கருத்து நேற்று உரைக்கப்பட்டது. இது தமிழருக்கு மட்டுமல்ல இந்தி மொழி பேசாத எந்த மாநிலத்து மக்களுக்கும் உடன்பாடு இருக்காது, இருமொழிக் கொள்கை என்பதுதான் அண்ணா இந்த மண்ணுக்கு வகுத்துக் கொடுத்த அழியாத ஜீவக் கொள்கை. இந்த இருமொழி கொள்கைக்கு தமிழர்களும் உறுதியாக இருப்பார்கள் இந்த அரசும் உறுதுணையாக இருக்கவேண்டும் என நாங்கள் விரும்புகிறோம்”, என தெரிவித்தார்.
