நாமக்கல் ராசிபுரம் திருமணிமுத்தாற்றில் ஏற்பட்ட வெள்ளப்பெருக்கினால் அக்கரைப்பட்டி ஏரியின் அணைக்கட்டு உடைந்ததின் காரணமாக வெள்ளநீர் விவசாய நிலங்களில் புகுந்தது. இதன் காரணமாக பயிர்கள் சேதமடைந்தன.
நாமக்கல் மாவட்டம் ராசிபுரம் அடுத்த மதியம்பட்டி பகுதியில் திருமணிமுத்தாறு பாய்ந்து ஓடுகிறது. சேலம் மாவட்டம் ஏற்காடு மலை அடிவாரத்தில் உற்பத்தியாகும் திருமணிமுத்தாறு சேலம் மாவட்டத்தின் பல்வேறு பகுதிகள் வழியாக பாய்ந்து நாமக்கல் மாவட்டத்தில் பல்வேறு கிராமங்கள் வழியாக சென்று நன்செய் இடையாறு அருகே காவிரி ஆற்றில் கலக்கிறது.
நேற்று சேலம், நாமக்கல் மற்றும் சுற்று வட்டாரங்களில் கன மழை காரணமாக திருமணிமுத்தாற்றில் வெள்ளம் பெருக்கெடுத்து ஓடுகிறது. இதனால் மதியம்பட்டி அருகே அக்கரைப்பட்டியில் ஏரியின் அணைக்கட்டு உடைப்பு ஏற்பட்டு, அந்நீரானது விவசாய நிலங்களுக்குள் புகுந்தது.
இதனால் 50க்கும் மேற்பட்ட ஏக்கர்களில் பயிரிடப்பட்டிருந்த தென்னை, சோளம், நெல் ஆகிய பயிர்கள் நீரில் மூழ்கின. உரிய அரசு அலுவலர்கள் நடவடிக்கை மேற்கொண்டு அணைக்கட்டில் ஏற்பட்ட உடைப்பை சரிசெய்ய வேண்டும் எனவும் விவசாயிகள் கோரிக்கை வைத்துள்ளனர்.
இதையும் படியுங்க: திருமணிமுத்தாற்றில் பொங்கும் நுரை - அச்சப்படும் மக்கள்!
