நாமக்கல்லைச் சேர்ந்த வழக்கறிஞர் நல்வினை விஸ்வராஜு இன்று ராசிபுரம் காவல் உதவி ஆய்வாளரிடம் ஒரு புகார் மனு அளித்தார். அதில், 'இலங்கையைச் சேர்ந்த குமாரசாமி, பரிமளாதேவி தம்பதியினர் 2014ஆம் ஆண்டு தங்களுக்கு குழந்தை இல்லை என்பதற்காக தமிழ்நாடு வந்துள்ளனர்.
அப்போது, தாராபுரம் பாலாஜி சூர்யா மருத்துவமனை உடந்தையுடன் பரிமளாதேவிக்கு பிரசவ வலி ஏற்பட்டதாக பொய்யாகக் கூறி அங்கு சிகிச்சைக்காக அனுமதிக்கப்பட்டார். அப்போது, மருத்துவர்களுடன் நடந்த பேரத்தின் முடிவில், இலங்கை தம்பதிக்கு 2014 பிப்ரவரி 24 பெண் குழந்தை பிறந்ததாகவும், அதற்கு பாலாஜி சூர்யா மருத்துவமனையின் மருத்துவர் லோக நாயகி சான்றிதழ் அளித்ததாகவும் கூறி வேறு தம்பதிக்கு பிறந்த குழந்தையுடன் அத்தம்பதி இலங்கை சென்றுவிட்டது.
ஆனால் அந்தப் பெண் குழந்தை, சேலம் அரசு மருத்துவமனையில் வடிவேல், அமுதா தம்பதியினருக்கு பிறந்திருக்கிறது. காலையில் பிறந்த குழந்தையை இலங்கை தம்பதியிடம் ரூ.4 லட்சத்துக்கு விற்றுவிட்டு, குழந்தையை பெற்றவரிடம் ரூ.30 ஆயிரம் கொடுத்துள்ளனர்' என ராசிபுரம் குழந்தை விற்பனையாளர் அமுதா மீது காவல் துறையினரிடம் புகார் கூறப்பட்டுள்ளது.
மேலும் இந்த வழக்கில் மருத்துவர்கள், செவிலியர் என பலரும் சம்பந்தப்பட்டிருப்பதால் மருத்துவக் குழு அமைத்து விசாரிக்கவும் அந்த மனுவில் கோரிக்கை விடுக்கப்பட்டுள்ளது.
