காளைகளை இறக்குமதி செய்வதை தமிழ்நாடு அரசு நிறுத்த வேண்டும்!

நாகப்பட்டினம்: வெளிநாடுகளில் இருந்து காளைகளை இறக்குமதி செய்வதை தமிழ்நாடு அரசு நிறுத்த வேண்டும் என சட்டப்பேரவை உறுப்பினர் தமிமுன் அன்சாரி தெரிவித்துள்ளார்.

இதுதொடர்பாக மனிதநேய ஜனநாயக கட்சியின் பொதுச் செயலாளரும், நாகப்பட்டினம் சட்டப்பேரவை உறுப்பினருமான தமிமுன் அன்சாரி அறிக்கை ஒன்றை வெளியிட்டுள்ளார்.

அதில் கூறியிருப்பதாவது:'தமிழ்நாட்டில் பால் உற்பத்தியைப் பெருக்கும் திட்டத்துடன், மாடுகளிடையே இனப்பெருக்கத்தை அதிகரிக்கும் வகையில் மரபணு மாற்றம் செய்யப்பட்ட கலப்பின காளைகள் மற்றும் பசுக்களை ஐரோப்பிய நாடுகளிலிருந்து 2 ஆண்டுகளுக்கு ஒரு முறை தேசிய பால்வள அபிவிருத்தி வாரியத்தின் அனுமதியுடன், தமிழ்நாடு அரசின் கால்நடை பராமரிப்புத்துறை இறக்குமதி செய்து வருகிறது.

அந்த வகையில் சமீபத்தில் ஜெர்மனியிலிருந்து 115 ஜெர்சி ரக காளைகள் இறக்குமதி செய்யப்பட்டுள்ளன. இந்த வகையான கால்நடைகள் ஐரோப்பிய மரபணுக்களுக்கும், பருவ காலத்திற்கும் ஏற்றவை. அதிக பால் உற்பத்திக்காக மரபணு மாற்றங்களுடன் செயற்கை வழியில் உருவாக்கப்படுபவை. இந்த ரக மாடுகள் வெப்பமண்டலப் பகுதிகளுக்கு ஏற்றவை அல்ல. இவை தமிழ்நாடு மக்களின் உடல் நலத்திற்கும், தமிழ்நாடு தட்பவெப்ப நிலைக்கும் பொருத்தமற்றவையாகும்.

குளிர்பிரதேசங்களைச் சேர்ந்த அந்த மாடுகளிடம், திமில் மற்றும் வியர்வை நாளங்கள் இல்லாததால், அதன் வெப்பம் பால் மற்றும் சிறுநீர் வழியாகவே வெளியேறும் என்றும், அவற்றின் சாணமும், சிறுநீரும் நம் விவசாய நிலத்திற்கு பயனற்றவை என்றும் கூறப்படுகிறது. அதிகமான பால் உற்பத்தி என்ற பெயரில், தொழிற்சாலையில் உற்பத்தி செய்வது போன்ற இந்த ரக மாடுகளை, நமது ரக மாடுகளுடன் கலப்பினம் செய்வதால், ஏற்படும் சாதக, பாதகங்களை சற்று நிதானமாக யோசிக்க வேண்டும் என கேட்டுக் கொள்கிறோம்.

நமது நாட்டின் பாரம்பரிய மாட்டு இனங்கள் அழிவதற்கு இது வழிவகுத்து விடக்கூடாது என்பதிலும் அதிக அக்கறை தேவை என்பதையும் சுட்டிக்காட்டுகிறோம். இதில் விவசாயிகளின் வாழ்வாதாரம், மக்களின் அன்றாட தேவை, சந்ததிகளின் ஆரோக்கியம், பாரம்பரிய கால்நடைகளின் பாதுகாப்பு ஆகியவையும் அடங்கியுள்ளது. இதற்கு மாற்றாக நம் மண்ணின் மரபுகளுக்கேற்ற கால்நடைகளிலிருந்து அதிகமான பால் உற்பத்தியை எவ்வாறு செய்வது என்பது குறித்து ஆராய்ச்சிகளை தீவிரப்படுத்தும். நமது மாட்டு இனங்களை சர்வதேச சந்தைக்கு ஏற்றுமதி செய்வது குறித்து திட்டமிடுவதும், நமது நாட்டு ரக மாடுகள் மூலம் பால் உற்பத்தியில் ஏற்றுமதி நிலையை அடைவது குறித்தும் அதற்கான முன்முயற்சிகளை தமிழ்நாடு அரசு மேற்கொள்ள வேண்டும்.

ஏற்கெனவே, பாலில் நடைபெறும் கலப்படம் காரணமாக ஒவ்வாமை மற்றும் நரம்பு மண்டலக் கோளாறுகள் உள்ளிட்ட பல்வேறு நோய்கள் மக்களிடம் அதிகரித்து வரும் நிலையில், நமது மண்ணுக்கும், மரபுக்கும் ஒத்துவராத குளிர்ப் பிரதேச மாடுகளின் கலப்பினம் மூலம் உற்பத்தியாகும் பாலின் ஆரோக்கியம் குறித்தும் அதிகம் கவலைப்பட வேண்டியுள்ளது. தமிழ்நாடு அரசு இந்த ரக காளைகளை இறக்குமதி செய்வதை நிறுத்தி வைக்கவேண்டும் என்றும், இதன் சாதக, பாதகங்கள் குறித்து ஆராயக்குழு அமைப்பது குறித்தும் யோசிக்க வேண்டும்' எனக் குறிப்பிடப்பட்டுள்ளது.

இதையும் படிங்க:7 பேர் விடுதலை: ஆளுநருக்கு தமிமுன் அன்சாரி எச்சரிக்கை