1,500 மதுபாட்டில்கள் பறிமுதல்; நாகை போலீஸ் அதிரடி!

நாகை: மயிலாடுதுறை அருகே வாகன சோதனையின்போது, புதுச்சேரியில் இருந்து கடத்திவரப்பட்ட 1,500 மதுபாட்டில்களை காவல்துறையினர் பறிமுதல் செய்தனர்.

நாகை மாவட்டம் மயிலாடுதுறை, சீர்காழி, தரங்கம்பாடி உள்ளிட்ட பகுதிகளுக்கு புதுச்சேரியில் இருந்து சட்டவிரோதமாத மதுபாட்டில்கள் கடத்திவரப்படுவதாக காவல்துறையினருக்கு தகவல் கிடைத்தது.

இதனை தடுப்பதற்காக பாலையூர் காவல் சரகத்திற்கு உட்பட்ட கத்திரிமூலை மெயின்ரோட்டில் மதுவிலக்கு அமலாக்கப்பிரிவு சிறப்பு காவலர்கள் வாகன சோதனையில் ஈடுபட்டனர்.

அப்போது அவ்வழியாக வந்த ஸ்கார்பியோ காரை நிறுத்தி சோதனை செய்ததில், காரில் சட்டத்திற்கு புறம்பாக புதுச்சேரியில் இருந்து 1,500 மதுபாட்டில்கள் கடத்தி கொண்டுவரப்பட்டது தெரியவந்தது. உடனடியாக கார் உட்பட மதுபாட்டில்களையும் காவல்துறையினர் பறிமுதல் செய்தனர்.

மேலும், காரை ஓட்டி வந்த காரைக்கால் மாவட்டத்தைச் சேர்ந்த அற்புதராஜ் என்பவர் கைது செய்யப்பட்டார். இதுகுறித்து காவல்துறையினர் வழக்குப்பதிவு செய்து விசாரணை மேற்கொண்டு வருகின்றனர்.