மயிலாடுதுறை: மயிலாடுதுறை மாவட்டம் குத்தாலம் அருகே திருவேள்விக்குடி கிராமத்தில் மூதாட்டியை வீடுபுகுந்து தாக்கிய வழக்கில் 12 ஆண்டுகளுக்குப் பிறகு திமுக முன்னாள் சட்டமன்ற உறுப்பினர்கள் இருவர் (அப்பா, மகன்) உள்ளிட்ட 6 பேருக்கு தலா 2 ஆண்டுகள் தண்டனை விதித்து மயிலாடுதுறை மாவட்ட குற்றவியல் நடுவர் நீதிமன்றம் உத்தரவிட்டுள்ளது.
மயிலாடுதுறை மாவட்டம் குத்தாலம் அருகே திருவேள்விக்குடி கிராமத்தைச் சேர்ந்த தங்கசாமி மனைவி மீனாட்சி (62). இவரது வீட்டில் 2012 ஆம் ஆண்டு பிப்ரவரி மாதம் 15 ஆம் தேதி நடைபெற்ற தாக்குதலில், மீனாட்சி காயமடைந்து குத்தாலம் அரசு மருத்துவமனையில் உள்நோயாளியாக அனுமதிக்கப்பட்டு சிகிச்சை பெற்றார். இதுகுறித்து குத்தாலம் காவல் நிலையத்தில் மீனாட்சி புகார் அளித்திருந்தார்.
தங்கசாமியின் மகன் அதிமுகவில் இணைய இருந்ததால், இந்த தாக்குதல் நடைபெற்றதாகக் கூறப்பட்டது. இந்நிலையில் மீனாட்சியைத் தாக்கிய வழக்கில் பிச்சைமுத்து மகன்கள் பி.சந்திரசேகர், திமுக முன்னாள் சட்டமன்ற உறுப்பினர்க் குத்தாலம் பி.கல்யாணம், கோவிந்தராஜ், குத்தாலம் பி.கல்யாணம் மகன்கள் க.அன்பழகன், கடலங்குடி ஊராட்சி மன்ற தலைவர் க.அறிவழகன், மனோகர், ரவி உள்ளிட்டோர் மீது குத்தாலம் காவல் நிலையத்தில், இந்தியத் தண்டனைச் சட்டம் 147, 294 (பி), 324 மற்றும் 506/2 ஆகிய 4 பிரிவுகளில் வழக்குப் பதிவு செய்யப்பட்டது.
இந்த வழக்கு, மயிலாடுதுறை மாவட்ட குற்றவியல் நடுவர் நீதிமன்றத்தில் நடைபெற்று வந்தது. இந்நிலையில், கடந்த 12 ஆண்டுகளுக்குப் பிறகு இந்த வழக்கின் விசாரணை முடிவுற்ற நிலையில், நீதிபதி கலைவாணி இன்று தீர்ப்பு வழங்கினார். அதன்படி குற்றவாளிகளுக்கு இரண்டு ஆண்டுகள் தண்டனை விதித்து நீதிபதி உத்தரவிட்டார்.
தண்டனையை ஒத்தி வைக்கக் கோரி அளிக்கப்பட்ட மனுவின் மீது ஆணை பிறப்பித்த நீதிமன்றம், வழக்கின் மேல்முறையீட்டுக்காக ஒரு மாத காலம் அவகாசம் வழங்கி உள்ளது. இந்நிலையில், முன்னாள் திமுக சட்டமன்ற உறுப்பினர்கள் இரண்டு பேருக்குத் தண்டனை விதிக்கப்பட்ட சம்பவம் மயிலாடுதுறையில் பரபரப்பை ஏற்படுத்தியுள்ளது.
திமுக முன்னாள் சட்டமன்ற உறுப்பினரான குத்தாலம் பி.கல்யாணம் கட்சியின் உயர்மட்ட செயல் திட்டக்குழு உறுப்பினராக உள்ளார். மேலும் இவரது மகனும் முன்னாள் சட்டப்பேரவை உறுப்பினருமான குத்தாலம் க.அன்பழகன், தற்போது திமுக மாநில கொள்கை பரப்பு துணை செயலாளராகவும் பதவி வகித்து வருவது குறிப்பிடத்தக்கது.
