விழுப்புரம் முதல் நாகை மாவட்டம் வேளாங்கண்ணி வரையிலான என்.எச்.45 ஏ சாலை, நான்கு வழி சாலையாக விரிவாக்கம் செய்யப்பட உள்ளது. அதற்கான நிலம் கையகப்படுத்தும் பணிகள் நடைபெற்று வருகிறது. இந்நிலையில், சீர்காழி முதல் தரங்கம்பாடி வரை கையகப்படுத்தப்படும் நிலம் மற்றும் வீடுகளுக்கு சதுர அடி ஒன்றுக்கு ரூபாய் 6 மட்டுமேவழங்கப்படுகிறது. எனவே தங்களின் விளை நிலங்களுக்கு மிகக் குறைந்த ரூபாய் வழங்கப்படுவதை ஏற்காத விவசாயிகள், கூடுதல் விலை வழங்க வலியுறுத்தி பல்வேறு கட்டப்போராட்டங்களில் ஈடுபட்டு வருகின்றனர்.
ஆனாலும் உரிய விலை நிர்ணயம் செய்யப்படவில்லை என கடந்த 30ஆம் தேதி குறைந்த விலைக்கு நிலத்தை கையகப்படுத்தும்மத்திய மாநில அரசுகளை கண்டித்து சீர்காழி மற்றும் தரங்கம்பாடி தாலுகாவுக்கு உட்பட்ட கிராமங்களைச் சேர்ந்த விவசாய நில உரிமையாளர்கள் கண்டன ஆர்ப்பாட்டம் அறிவித்திருந்தனர்.
இந்நிலையில் நாகை மாவட்டத்திற்கு தேர்தல் பரப்புரைக்காக தமிழ்நாடுமுதலமைச்சர் வந்ததையடுத்து ஆர்ப்பாட்டத்தை விளக்கிக்கொள்ளுமாறும், ஆட்சியர் தலைமையிலான அமைதிப் பேச்சுவார்த்தைக்கு ஏற்பாடு செய்து தங்கள் கோரிக்கைகளை நிறைவேற்ற நடவடிக்கை எடுப்பதாகவும் தரங்கம்பாடி வட்டாட்சியர் கூறியதால் விவசாயிகள் ஆர்ப்பாட்டத்தை கைவிட்டனர்.
இந்நிலையில் விவசாயிகள் இன்று ஆட்சியரை சந்திக்க வந்தனர். ஆனால் ஆட்சியர் விவசாயிகளை சந்திக்காமல் புறக்கணித்து சென்றதாகக் கூறப்படுகிறது.
எனவே, விவசாயிகள் தங்களின் கோரிக்கைகளை மாவட்ட வருவாய் அலுவலர் இந்துமதியிடம் மனுவாக அளித்தனர். முதலமைச்சர் எடப்பாடியின் சேலம் மாவட்டத்திற்கு மட்டும் சாலை விரிவாக்க பணிக்காக கையகப்படுத்தப்படும் நிலத்திற்கு சதுர அடி ரூபாய் 500 கொடுக்கும் தமிழக அரசு, இங்கு மட்டும் 6 ரூபாய் கொடுப்பதுஇப்பகுதி மக்களை வஞ்சிக்கும் செயல்.
எங்களை சந்திக்காமல் புறக்கணித்த மாவட்ட ஆட்சியர் சுரேஷ்குமார், கோரிக்கைகளை விரைந்து நிறைவேற்றாவிட்டால் நடைபெற உள்ள நாடாளுமன்றத் தேர்தலை சுமார் 25 ஆயிரத்துக்கும் மேற்பட்ட மக்கள் புறக்கணிப்போம் என்றும்,தங்களுடைய வாக்காளர் அடையாள அட்டை, குடும்ப அட்டை உள்ளிட்ட அரசால் வழங்கப்பட்ட ஆவணங்களை ஆட்சியர் அலுவலகத்தில் ஒப்படைத்து சொந்த நாட்டிலேயே அகதிகளாக செல்ல உள்ளோம் என்றும் கூறி விவசாயிகள் வேதனை தெரிவித்தனர்.
