காதல் தம்பதி தூக்கிட்டுத் தற்கொலை: உறவினர்கள் வெறுத்ததால் தவறான முடிவு!

மயிலாடுதுறை: தரங்கம்பாடி அருகே உறவினர்கள் வெறுத்ததால் காதல் தம்பதி தூக்கிட்டுத் தற்கொலை செய்துகொண்ட சம்பவம் குறித்து காவல் துறையினர் விசாரணை நடத்திவருகின்றனர்.

மயிலாடுதுறை மாவட்டம் தரங்கம்பாடி தாலுகா செம்பனார்கோவில் அருகேவுள்ள செங்கமேட்டுத் தோப்பில் ஒரு ஆணும், பெண்ணும் தனித்தனியே தூக்கிட்டுத் தற்கொலை செய்துகொண்டனர். இதனைக் கண்ட அப்பகுதி மக்கள் இது குறித்து திருச்சம்பள்ளி கிராம நிர்வாக அலுவலர் மகேஸ்வரிக்கும், காவல் துறையினருக்கும் தகவல் தெரிவித்தனர்.

பின்னர், சம்பவ இடத்திற்கு விரைந்துவந்த காவல் துறையினர், இருவரது உடல்களையும் மீட்டு உடற்கூராய்வுக்காக மயிலாடுதுறை அரசு மருத்துவமனைக்கு அனுப்பிவைத்தனர். மேலும், அவர்கள் தூக்கிட்ட இடத்தில் இருசக்கர வாகனம், செல்போன், கைப்பை ஆகியவை கிடந்துள்ளன. அந்தப் பையில் ஒரு கடிதம் சிக்கியது.

அதில், “நாங்கள் இருவரும் சேர்ந்து வாழ்வது எங்களது உறவினர்களுக்குப் பிடிக்கவில்லை, அதனால் எங்களை யாரும் மதிப்பதில்லை, எங்களைப் பார்க்க யாரும் வருவதில்லை. இதனால், நாங்கள் மன உளைச்சலுக்கு ஆளானோம். நாங்கள் யாரிடமும் கடன் வாங்கவில்லை, ஈரோட்டில் சீட்டுப் போட்டுவைத்துள்ளோம்.

வீட்டுக்குத் தேவையான அனைத்துப் பொருள்களும் வீட்டில் வைத்திருக்கிறோம், அதை எடுத்துக் கொள்ளவும். எங்கள் இறப்பிற்கு யாரும் காரணம் இல்லை, எங்களது உறவை உறவினர்கள் ஏற்றுக் கொள்ளாததால் மன விரக்தியில் இந்த முடிவு எடுத்துள்ளோம்” என எழுதப்பட்டிருந்தது.

இது குறித்து வழக்குப்பதிவு செய்த காவல் துறையினர் விசாரணை மேற்கொண்டனர். முதற்கட்ட விசாரணையில், உயிரிழந்தவர்கள் கும்பகோணம் பட்டீஸ்வரம் சோழன்மாளிகை பகுதியைச் சேர்ந்த பெரியசாமி (30) என்பதும், இவர் கடந்த 5 வருடங்களுக்கு முன்பு செம்பனார்கோவில் வல்லம் பகுதியைச் சேர்ந்த ஒரு பெண்ணை திருமணம் செய்துகொண்டு மாமனார்வீட்டில் வசித்துவந்ததும் தெரியவந்தது.

மாமனார் வீட்டுக்கு எதிரே இருந்த துரைராஜ் மகள் துர்காதேவி (21) என்பவருடன் பழக்கம் ஏற்பட்டது. துர்க்காதேவி மயிலாடுதுறையில் உள்ள தனியார் கல்லூரியில் முதலாம் ஆண்டு பயின்றுவந்துள்ளார். இந்நிலையில் 2019ஆம் ஆண்டு பெரியசாமி, துர்காதேவியை அழைத்துசென்று திருமணம் செய்துகொண்டு கடந்த 2 வருடங்களாக ஈரோடு சத்தியமங்கலத்தில் வசித்துவந்துள்ளார்.

உறவினர்கள் யாரும் இல்லாததால் மனவேதனையில் இருந்த பெரியசாமி, துர்காதேவி இருவரும் கடந்த சில தினங்களாக வேளாங்கண்ணி, பல்வேறு ஊர்களுக்குச் சென்றுவிட்டு நேற்று முன்தினம் காலை வல்லத்திற்கு வந்ததும், பின்னர் கடுவேலி செங்கமேட்டு தோப்பில் தூக்கிட்டு இறந்ததும் தெரியவந்தது.

இதையும் படிங்க: ஆன்லைன் விளையாட்டு: மன உளைச்சலில் மாணவன் தற்கொலை