நாகை மாவட்டம் தரங்கம்பாடி தாலுக்கா செம்பனார்கோவில் அருகே திருச்சம்பள்ளியில் உள்ள ஒழுங்குமுறை விற்பனை கூடத்தில் வாரந்தோறும் திங்கட்கிழமை நடைபெறும் பருத்தி ஏலம் நேற்று (22.06.20) நடைபெற்றது.
இதில் 900-க்கும் மேற்பட்ட விவசாயிகள் 5500 குவிண்டால் பருத்தியை விற்பனைக்காக கொண்டு வந்தனர்.மேலும் ஒழுங்குமுறை விற்பனைக் கூட கட்டிடத்தில் 2000 குவிண்டால்வரை மட்டுமே வைக்க இடவசதி உள்ள நிலையில், மேலும் 2000 குவிண்டால் பருத்தியை விவசாயிகள் விற்பனைக்கூட வளாகத்தில் வாசல்வரை ஏலத்துக்காக அடுக்கி வைத்தனர்.
இடப்பற்றாக்குறை காரணமாக சுமார் 1500 குவிண்டாலை இறக்கி வைக்க முடியாததால் விவசாயிகள் திருப்பி எடுத்து சென்றனர். கடந்த வாரம் நடைபெற்ற ஏலத்தில் தனியார் வியாபாரிகள் குறைந்த விலைக்கு ஏலம் கேட்பதாக குற்றம்சாட்டி விவசாயிகள் போராட்டத்தில் ஈடுபட்டதால், நேற்று நடைபெற்ற ஏலத்தில் தனியார் வியாபாரிகள் பங்கேற்கவில்லை.
இதையடுத்து, பருத்தியின் ஈரப்பதத்தை அளவிட்ட இந்திய பருத்திக்கழக அதிகாரிகள் 12 சதவீகிதம் வரை ஈரப்பதம்கொண்ட 1500 குவிண்டால் பருத்தியை குறைந்தபட்சம் 1 குவிண்டாலுக்கு ரூ.5330 முதல் அதிகபட்சம் ரூ.5550 வரை ஏலம் எடுத்துச் சென்றனர்.
இதையடுத்து, மீதமுள்ள பருத்தி ஏலம் போகாதது குறித்து விவசாயிகள் பூம்புகார் தொகுதி எம்எல்ஏ பவுன்ராஜிடம் முறையிட்டனர். இதையடுத்து அவர் தனியார் வியாபாரிகளிடம் பேச்சுவார்த்தை நடத்தி தனியார் வியாபாரிகளையும் ஏலத்துக்கு அழைத்தார்.
ஏலத்தில் பங்கேற்ற தனியார் வியாபாரிகள் மீதமிருந்த 2500 குவிண்டால் பருத்தியை ஒரு குவிண்டாலுக்கு குறைந்தபட்சம் ரூ.3500 முதல் அதிகபட்சம் ரூ.4620 வரை ஏலம் எடுத்துச் சென்றனர்.
இதையடுத்து, தனியார் வியாபாரிகள் அரசின் ஆதார விலையான ரூ.5232க்கு பருத்தியைக் கொள்முதல் செய்யவும், பருத்தியை சேமித்து வைக்க புதிய சேமிப்பு கிடங்கு அமைத்துத் தரவும் அரசுக்கு கோரிக்கை விடுத்துள்ளனர்.
இதையும் படிங்க: உயரும் பெட்ரோல் டீசல் விலை: அத்தியாவசிய பொருள்களின் விலை உயரும் அபாயம்
