அரசு மருத்துவமனையில் தண்ணீர் குழாய் பழுதுபார்க்கும் பணி: கரோனா நோயாளிகள் அவதி!

நாகப்பட்டினம்: மயிலாடுதுறையில் கரோனா சிறப்பு அரசு மருத்துவமனையில் உள்ள தண்ணீர் குழாயில் பழுதுபார்க்கும் பணி நடைபெற்றதால் நோயாளிகள் தண்ணீரின்றி அவதிக்குள்ளாகினர்.

நாகப்பட்டினம் மயிலாடுதுறை அரசு பெரியார் மருத்துவமனை வளாகத்தில் கரோனா தொற்று நோயாளிகளுக்கு சிகிச்சையளிக்கப்பட்டு வருகிறது. இங்கு இதுவரை 2 ஆயிரம் நோயாளிகள் சிகிச்சை பெற்று நலமாக வீடு திரும்பியுள்ளனர்.

200 படுக்கை வசதி கொண்ட இந்த சிகிச்சை மையத்திற்கு தினந்தோறும் நோயாளிகள் வருகை அதிகரித்த வண்ணம் உள்ளது. நேற்று 191 நோயாளிகள் சிகிச்சையில் இருந்தனர். ஐந்து மாடிக் கட்டடத்தில் நான்கு மாடிகள் வரை நோயாளிகள் உள்ளனர்.

நேற்று மாலையிலிருந்து நோயாளிகள் தங்கியுள்ள அறைகளுக்கு தண்ணீர் இல்லாததால் நோயாளிகள் கடும் அவதிக்குள்ளாகியிருக்கின்றனர்.

இது குறித்து மருத்துவமனை நிர்வாகத்திடம் கேட்டபோது, தண்ணீர் குழாயில் ஏற்பட்ட கசிவின் காரணமாக தண்ணீர் நிறுத்தப்பட்டு, பழுது பார்க்கும் பணி நடைபெறுவதாகவும், உடனடியாக சரி செய்யப்படும் என்றும் தெரிவித்தனர்.