மதுரை மாவட்டம் செக்காணூரணி அ.கொக்குளம் கிராமம் பல்வேறு சாதியினர் வாழும் கிராமமாகும். இங்குள்ள பேய்க்காமன் கருப்பசாமி கோயில் மதுரை மாவட்டத்தில் மிகவும் புகழ்பெற்ற ஒன்று. புறம்போக்கு நிலத்தில் கட்டப்பட்டுள்ள இந்தக் கோயிலில் பட்டியலின மக்களே பல தலைமுறைகளாக பூசாரிகளாக இருந்துவருகின்றனர். அப்படி பூசாரிகளாக இருக்கும் பட்டியலின மக்களின் குடும்பங்களை தவிர பிற பட்டியலின மக்கள் கோயிலுக்குள் அனுமதிக்கப்படுவதில்லை.
இதனைக் கண்டித்து பல தலைமுறைகளாக போராட்டங்கள் நடந்தும் பயனில்லை. இதுகுறித்து அவ்வூரைச் சேர்ந்தவரும், பெங்களூருவில் பணியாற்றும் ஐடி ஊழியருமான அன்பழகன் கூறுகையில், 'நான் சமீபத்தில் பெங்களூருவிலிருந்து அ.கொக்குளம் வந்தேன். அப்போது கருப்பசாமி கோயிலில் வழிபடச் சென்றபோது, உள்ளே என்னை அனுமதிக்கவில்லை. காரணம் கேட்டால் சாதியை சுட்டிக்காட்டினர். அதனால், சட்ட ரீதியாக போராட முடிவெடுத்து உயர் நீதிமன்ற மதுரைக் கிளையில் வழக்கு தொடர்ந்தேன். இந்த வழக்கில், 12 வாரங்களுக்குள் வட்டாட்சியர் தீர்வு காண வேண்டும் என்று உத்தரவிடப்பட்டது. ஆனால் இதுவரை தீர்வு காணப்படவில்லை. கோயில் வழிபாடு எங்களின் அடிப்படை மனித உரிமை. குறிப்பிட்ட சிலரால் உரிமை மறுக்கப்படுகிறது. அனைத்து சாதி மக்களும் ஒற்றுமையாக வழிபாடு நடத்த வேண்டும் என்பதுதான் எங்களது வேண்டுகோள்' என்றார்.
தற்போது இந்த சிக்கல் பூதாகரமாக வெடித்துள்ளதைத் தொடர்ந்து, தங்களுக்கான உரிமையைக் கோரி பட்டியலினத்தவர் போராட்டம் நடத்தியுள்ளனர். மேலும் தீர்வு கிடைக்காத பட்சத்தில் ஜூலை 31-ஆம் தேதி கோவில் நுழைவுப் போராட்டத்தையும் அறிவித்துள்ளனர்.
இதுகுறித்து பேசிய விடுதலைச் சிறுத்தைகள் கட்சியின் மாநில துணைச் செயலாளர் தென்னரசு, குறிப்பிட்ட சாதியின் ஒரு தரப்பினர் மட்டுமே கோயில் பூசாரிகளை தங்களின் கட்டுப்பாட்டுக்குள் வைத்துக் கொண்டு, இவ்வாறு இடையூறு செய்கின்றனர். காரணம் அவர்களால் அபகரிக்கப்பட்டுள்ள சொத்து விவரங்கள் குறித்து வெளியே தெரிந்துவிடும் என்ற அச்சம். நீதி வேண்டி தொடர்ந்து மதுரை மாவட்ட ஆட்சியரையும், வட்டாட்சியரையும் சந்தித்து பலமுறை வேண்டுகோள் விடுத்துள்ளோம். கொக்குளம் கருப்பசாமி கோயிலைப் பொறுத்தவரை அறநிலையத்துறைக்கு சொந்தமானது மட்டுமன்றி, இதன் பேரில் நன்செய், புன்செய் நிலங்கள் 8 ஏக்கர் அளவில் உள்ளன என்ற தகவலை இந்து அறநிலையத்துறை வழங்கியுள்ளது' என்கிறார்.
இக்கோவில் திருவிழா ஒவ்வொரு 15 அல்லது 20 ஆண்டுகளுக்கு ஒருமுறையே நடைபெறும். மிகக் கோலாகலமாக நடைபெறக்கூடிய விழாக்களுள் மிக முக்கியத்துவம் வாய்ந்தது. இதன் எருதுகட்டுத் திருவிழாவின்போது லட்சக்கணக்கான மக்கள் பங்கேற்பது வழக்கம்.
கொக்குளம் கிராமத்தைச் சேர்ந்த இளைஞர் அ.கண்ணன் இதுகுறித்து, மதுரையின் மிகத் தொன்மையான கிராமங்களுள் அ.கொக்குளமும் ஒன்று. இங்கு பூர்வீகமாக வாழ்ந்து வருபவர்கள் பட்டிலின மக்கள். முன்னோர் வழிபாட்டு முறையில் மிகுந்த நம்பிக்கை கொண்டவர்கள். குறிப்பிட்ட கருப்பசாமி வழிபாடு, பாரம்பரியப் பெருமை மிக்கது. திருவிழாவிற்கு மூன்று மாதங்களுக்கு முன்பிருந்தே உண்ணா நோன்பிருந்து வைராக்கியத்தோடும், இறை அச்சத்துடனும் வழிபடுவது வழக்கம். கொக்குளத்தில் நடைபெறுகின்ற திருவிழா என்றாலும், சுற்றியுள்ள பல கிராமங்களோடு பல்வேறு வகையான தொடர்புகளுடன் இந்த விழா நடைபெறும். சுற்றியுள்ள ஊர்களைச் சேர்ந்த அனைத்து பிரிவு மக்களும் இந்த விழாவில் பங்கேற்று கருப்பசாமியை வழிபட்டுச் செல்வது காலங்காலமாய் இருந்து வரும் மரபு' என்கிறார்.
தென் தமிழகத்திலேயே 20 ஆண்டுகளுக்கு ஒருமுறை கோவில் திருவிழா நடைபெறுவது அ.கொக்குளம் கிராமத்தில்தான். ஆகையால் மிகுந்த எதிர்பார்ப்போடும் ஆரவாரத்துடனும். சமூக நல்லிணக்கத்துடன் நடைபெற்று வரும் இந்தத் திருவிழாவில் திட்டமிட்டு சாதியப் பாகுபாடு புகுத்தப்படுவது பூர்வகுடி பட்டியலின மக்களை பெரும் வேதனைக்குள் ஆழ்த்தியுள்ளது. கோயில் நுழைவுப் போராட்டம் நடத்தி இந்தியாவிற்கே முன்னுதாரணமாகத் திகழ்ந்தது மதுரை மண்ணாகும். ஆனால், விடுதலை பெற்ற இந்தியாவில் இப்போதும் வழிபாட்டு உரிமை மறுக்கப்பட்டு கோவில் நுழைவு போராட்டம் நடத்த வேண்டிய சூழல் ஏற்பட்டுள்ளது வேதனைக்குரியது மட்டுமல்ல அவமானத்திற்குரியதாகும்.
இதையும் படிங்க: தன்பாத் நீதிபதி கொலை- உச்ச நீதிமன்றம் தாமாக முன்வந்து விசாரணை!
